Bunu Son.az-a açıqlamasında "Bakı Xəbər" qəzetinin baş redaktoru, siyasi ekspert Aydın Quliyev deyib.

O bildirib ki, müavinətlərin və pensiyaların artırılması ölkədə həyata keçirilən tədbirlərin nəticəsidir:

"Xüsusilə həssas təbəqələrin sosial müdafiəsinə yönəlmiş addımlar Azərbaycanda dövlət siyasətinin artıq davamlı bir istiqamətinə çevrilib və hansı şəraitdə olmağımızdan asılı olmayaraq bu yöndə dövlətin addımları artıq ənənəvi və fasiləsiz bir xarakter alıb.

Vətən müharibəsinin ən ağır günlərində də Azərbaycanda bu yöndə addımlar atılırdı, Vətən müharibəsinə qədər də, müharibədən sonra ərazilərimizin bərpası kimi ağır bir yükün dövlətin üstünə oturmasına baxmayaraq, sosial dəstək və müdafiə addımları müharibədən sonra da davam etdirilir. 

Elə bu günlərdə biz onun bariz bir nümunəsini gördük. Prezidentin Fərmanı ilə sosial dəstək və sosial müdafiə paketinin yeni bir tranşı açıldı. Ölkədə minimum əməkhaqqının artırılması, minimum pensiya həddinin qaldırılması, yaşayış minimumunun qaldırılması və bu yöndə atılan digər addımlar əhalinin həssas təbəqlərinin vəziyyətinin yaxşılaşdırılmasına və xaricdə artan infilyasiya təzyiqləri qarşısında onların vəziyyətini müdafiə etmək məqsədi daşıyır. 

Çox yaxşı bir haldır ki, ölkədə həyata keçirilən tədbirlərin nəticəsi olaraq bu il ölkədə orta aylıq əməkhaqqı artıq 900 manata hədəflənib. Bütün bunlar ölkədə əməkhaqqlarının, eləcə də sosial müavinətlərin, pensiya və təqaüdlərin artımına lazımı şəraiti yaradacaq. Xüsusilə də minimum pensiyanın bu gün müstəqil Azərbaycanın tarixində ilk dəfə olaraq 200 dollardan (280 manat) artıq bir həddə çıxması yaxşı bir göstəricidir. 

Eləcə də minimum əməkhaqqının 345 manata qaldırılması və bunun həm özəl sektora, həm də dövlət sektorunda çalışanlara aid edilməsi yaxşı bir haldır. Çox yaxşı hallardan biri də odur ki, minimum əməkhaqqlarının artırılması üçün lazım olan vəsait dövlət büdcəsindən ayrılıb ki, bu da az məbləğ deyil.

Bundan başqa, müharibə dövründə xəsarət almış bizim qəhrəman və yaralı övladlarımızın dəstəklənməsi yönündə də çox əhəmiyyətli addımlar var. Məsələn, həmin insanların çox yüksək texnologiyalı protezlərlə təmin olunmasına şahidik. Bu da insan faktoru və onun dəstəklənməsinin dövlət siyasətinin vacib bir hədəfi olduğunu bu məsələdə də göstərir.

Bir sözlə, həssas təbəqələrin sosial müdafiəsi və rifahının yaxşılaşdırılmasına yönəlmiş addımlar Azərbaycan dövlətinin siyasətində fasiləsiz və davamlı bir istiqamətə çevrilib. Bu da dövlətin sosial mahiyyətinin praktikada həqiqətən özünü göstərməsinə bir nümunədir".

Təhməz Əsədov Son.az