Konsert Beynəlxalq Muğam Mərkəzinin və Azərbaycan Dövlət Mədəniyyət və İncəsənət Universitetinin birgə "Yeni nəsil dəvət edir" layihəsi çərçivəsində reallaşıb.

Konsert ilk olaraq Xalq çalğı alətləri kafedrasının müəllimi, Respublika və Beynəlxalq müsabiqələrin qalibi, prezident təqaüdçüsü Mustafa Aşurovun dirijorluğu ilə Ü.Hacıbəylinin "Koroğlu" operasından Uvertura ilə başladı.

Daha sonra muğam sənəti, estrada sənəti kafedralarının tələbələri Xalq çalğı alətləri orkestrinin müşayiəti ilə S.Ələsgərovun "Vətənimdir", V.Adıgözəlovun "Bayram suitası", T.Quliyevin "Bakı haqqında mahnı", "Canım Bakı", E.Sabitoğlunun "Nə gözəldir Azərbaycan","Şirin dil", Ə.Tağıyevin "Qal sənə qurban", Ü.Hacıbəylinin "Cəngi","Çırpınırdı Qara dəniz", R.Mirişlinin "Bayram axşamlarında" mahnılarını səsləndirdilər.

Konsertdə Cəlal Məlikli, Rəvan Qaçayev, Xasay Şıxıyev, Məlik Məmmədov, Jalə Quliyeva, Aytac Fərəcov, Həmid Həmzəyev, Nurlan Kərimli, Ayxan Bünyadzadə çıxış ediblər.

Həmçinin konsertin son nömrələrindən biri olan " Qarabağ şikəstəsi" Muğam Televiziya Müsabiqəsinin qalibi, Azərbaycan Televiziyasının solisti Kamilə Nəbiyevanın və 2017-ci il Muğam Televiziya Müsabiqəsinin iştirakçısı Qəmbər Axundovun, Əmrah Məcidovun ifasında səsləndi.