2023-cü il yanvarın 27-də Azərbaycanın Tehrandakı səfirliyinə silahlı hücum baş verib. Hücum nəticəsində səfirliyin mühafizə xidmətinin əməkdaşı Orxan Əsgərov şəhid olub, daha iki nəfər yaralanıb. Yasin Hüseynzədə adlı şəxs səfirliyin binasına silahla daxil olub və birbaşa atəş açmağa başlayıb. Hücumun görüntüləri yayılıb və bu görüntülər onun planlı şəkildə, məqsədyönlü şəkildə səfirliyə hücum etdiyini açıq şəkildə göstərib.

Azərbaycan tərəfi bu hadisəyə dərhal sərt reaksiya verib. Rəsmi Bakı diplomatik nümayəndəliyin fəaliyyətini dayandıraraq əməkdaşlarını geri çağırıb. Prezident İlham Əliyev hücumu qətiyyətlə pisləyib və bu hadisənin arxasında təşkilatlanmış niyyətin olduğunu vurğulayıb. Bakı məsələni "şəxsi motiv" kimi təqdim etmək cəhdlərini rədd edib və İrandan şəffaf, obyektiv istintaq, cinayətkarın ciddi şəkildə cəzalandırılmasını tələb edib.

İranda Azərbaycan səfirliyinə qarşı terror törətmiş cinayətkarla bağlı məhkəmə qərarının icra edilməsi, Azərbaycan dövlətinin və Prezident İlham Əliyevin ədalətin bərpa olunması naminə sərgilədiyi qətiyyətli mövqeyin birbaşa nəticəsidir. Prezident İlham Əliyevin rəhbərliyi ilə Azərbaycan dövləti göstərdi ki, onun üçün ədalət boş söz yox, konkret nəticə deməkdir. 

Uzun müddət İran tərəfi bu hadisəyə qarşı passiv mövqe sərgiləyib. Lakin Azərbaycan tərəfinin apardığı davamlı beynəlxalq təzyiqlər və hüquqi əsaslandırılmış diplomatik fəaliyyət nəticəsində məsələ gündəmdə saxlanılıb. Nəhayət, İranın Ali Məhkəməsi bu ilin əvvəlində Yasin Hüseynzədəyə çıxarılmış ölüm hökmünü qüvvədə saxlayıb və bu gün - 2025-ci il mayın 21-də səhər saat 08:00-da hökm icra olunub. Edam xəbəri İranın rəsmi məhkəmə orqanları tərəfindən təsdiqlənib.

Azərbaycan dövləti vətəndaşına qarşı törədilmiş zorakılığı cavabsız qoymayıb və beynəlxalq hüquq çərçivəsində ədalətin bərpa olunmasına nail olub. Bu, həm də Azərbaycanın güclənən dövlətçilik ənənələrinin və xarici siyasətdə sərgilədiyi prinsipial mövqeyin bariz nümunəsidir. Hücumu törədən şəxsin edamı təkcə cinayətə verilmiş cəza deyil, həm də Azərbaycan dövlətinin əzmini göstərən tarixi nəticədir.

Bu hadisə Azərbaycan dövlətinin vətəndaşının hüquqlarının müdafiəsində heç vaxt geri çəkilmədiyini və harada olur-olsun, onun hüququnun bərpası üçün sonadək mübarizə apardığını göstərir. Dövlətimizin bu məsələdə göstərdiyi prinsipiallıq və qətiyyətlə bütün dünyaya açıq mesaj verdi ki, Azərbaycan vətəndaşı heç vaxt tək deyil!.

Qeyd edək ki, hazırda Azərbaycan və İran arasında münasibətlərdə normallaşma mərhələsi yaşanır. Səfirlik hücumundan sonra yaranmış gərginlik aradan qaldırılıb, tərəflər arasında diplomatik dialoq bərpa olunub. Qarşılıqlı səfərlər, iqtisadi əməkdaşlıqlar və sərhəd bölgələrində birgə layihələr bu münasibətlərin yenidən qurulduğunu deməyə əsas verir.

İslam Son.az