“Muzeydə Musiqi Gecələri”nin növbəti portretkonserti Xalq artisti Firəngiz Əlizadə yaradıcılığından bəhs edəcək

Kriminal 15 Yan 2025 17:30:00 56 0

Bakı Müasir Musiqi Cəmiyyəti və Muzey Mərkəzinin ortaq layihəsi olan "Muzeydə Musiqi Gecələri"nin növbəti portret-konserti Xalq artisti, professor Firəngiz Əlizadə yaradıcılığından bəhs edəcək. 23 yanvar saat 19:00-da Muzey Mərkəzində keçiriləcək portret-konsertdə bəstəkarın violin və piano üçün "İmpuls", piano üçün Sonata, simli kvartet üçün "Dilogia" əsərləri ifa ediləcək. Proqramda yer alan əsərlər Zərrin Əliyeva (violin), Elçin Məmmədov (piano), Humay Qasımzadənin (piano) və "Əkinçi" kvartetinin ifasında səslənəcək.

Giriş sərbəstdir.

Firəngiz Əlizadə 1947-ci ildə Bakıda anadan olmuşdur. İlk növbədə Azərbaycan Dövlət Konservatoriyası nəzdində xüsusi istedadlı uşaqlar üçün orta ixtisas musiqi məktəbində, daha sonra Azərbaycan Dövlət Konservatoriyasında bəstəkarlıq və fortepiano ixtisasları üzrə təhsil almışdır. Bəstəkarlıq ixtisası üzrə 1972-ci ildə professor Qara Qarayevin sinfini, fortepiano ixtisası üzrə 1970-ci ildə professor Urfan Xəlilovun sinfini fərqlənmə diplomu ilə bitirmişdir. 1970-ci ildə Azərbaycan Dövlət Konservatoriyasında (indiki Ü.Hacıbəyli adına Bakı Musiqi Akademiyası) pedaqoji fəaliyyətlə məşğul olmağa başlamış, 1972-1974-cü illər ərzində Qara Qarayevin assistenti kimi çalışmışdır.

Firəngiz Əlizadənin fəaliyyəti çoxşaxəli və genişdir. O, bəstəkar, musiqişünas, pedaqoq, dirijor, musiqi-ictimai xadim kimi beynəlxalq aləmdə böyük nüfuz qazanmış, pianoçu kimi Arnold Şönberq, Alban Berq, Anton Vebern, Paul Hindemit, Olivye Messian, Con Keyc, Corc Kramb və bir çox Azərbaycan bəstəkarlarının əsərlərinin ölkəmizdə ilk ifaçısı olmuşdur. Habelə öz əsərlərinin ifası zamanı həm pianoçu, həm də dirijor kimi çıxış etmişdir.

Firəngiz Əlizadə Azərbaycan Bəstəkarlar İttifaqının sədri, AMEA-nın müxbir üzvü, UNESCO-nun "Sülh artisti", "Şöhrət", "Şərəf" ordenləri laureatı, Bakı Beynəlxalq Multikulturalizm Mərkəzi Himayəçilik Şurasının üzvüdür.

İnformasiya dəstəyi - Trend.Az, Day.Az, Son.az, Azernews.Az