Son.az Trend-ə istinadən bildirir ki, bunu COP29-da enerji və maliyyə ilə bağlı gözləntilər və tələblər konfransında Enerji, Ətraf Mühit və İnkişaf Mərkəzinin rəsmisi Gerry Arances deyib.

O bildirib ki, enerji keçidinin əhəmiyyətini müzakirə edərkən Cənub-Şərqi Asiyanın mövcud enerji keçidi layihə və proqramlarının yarısını həyata keçirdiyini vurğulamaq lazımdır:

"Bu, CPB, Dünya Bankı və ya JetEase kimi ikitərəfli sazişlər vasitəsilə həyata keçirilir. Çətinliklərə baxmayaraq, bu mexanizmlər hələ də istifadə olunur və potensial genişlənməni məhdudlaşdırmır. Buna görə də, COP29-da mövqeyimizi təsdiqləmək və COP28-də müzakirə edilən paketin, xüsusilə fosil yanacaqlar, bərpa olunan enerji mənbələri və enerji səmərəliliyi ilə bağlı əhəmiyyətini vurğulamaq vacibdir. Bu isə maliyyələşmənin səfərbər edilməsini tələb edir. Bu çağırış Şimal və Cənub arasında mövcud olan iqlim fərqinin aradan qaldırılmasına imkan verəcək, vətəndaş cəmiyyəti hərəkatlarının illik 5 trilyon dollar tələb edən qlobal tələbinə uyğundur".

Qeyd edək ki, bu gün BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı baş tutub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.

COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.

COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.

COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.

İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.