"Brüssel formatının davamı kimi dəyərləndirilən və Avropa İttifaqı Şurasının prezidenti Şarl Mişelin moderatorluğu ilə keçən görüşdə Aİ-nin mülki missiyasının Ermənistan ərazisində 2 ay müddətinə monirtorinq həyata keçirmək məqsədi ilə ezam edilməsi qərara alındı. Bu missiya öz fəaliyyətini dekabrın 19-da başa çatdırdı. Lakin daha sonrakı dönəmdə 2 illik müddətə 200 nəfərlik heyyətin göndərilməsi haqqında qərarın Azərbaycanın razılığı olmadan və iştirakı nəzərdən keçirilmədən qəbul olunması bütün beynəlxalq normalara ziddir. Çünki bu missiya həm də Azərbaycanla sərhəddə yerləşdiriləcək.

Nəzərə almaq lazımdır ki, Azərbaycanla Ermənistan arasında sərhəd müəyyənləşdirilməyib, delimitasiya və demarkasiya prosesi icra olunmayıb və belə olan təqdirdə haqlı bir sual meydana gəlir: Bu missiya hansı məqsədi daşıyır, hansı qüvvə tərəfindən regiona ezam olunur və missiyanın tərkibində kimlər iştirak edəcək? 

Şübhəsiz ki, missiyanın həyata keçirilməsində Avropa İttifaqında dominant mövqeyə sahib olan Fransanın canfəşanlıq etməsi heç kimdə şübhə doğurmur. Fransa yeni formasiyada bu missiyanı göndərməklə Cənubi Qafqazda Ermənistandan alət kimi istifadə edir və burada öz maraqlarını güdür. Bununla yanaşı, Avropa İttifaqının bütün institutlarına təsir rıçaqlarını genişləndirən Fransa həm də ölkəmizə qarşı Avropa ittifaqı müstəvisində qərəzli qətnamənin qəbul olunmasına nail oldu və burada Fransanın birmənalı olaraq siyasi təsiri və izləri görünməkdədir. 

Eyni zamanda bu mülki missiya həm də regionda Rusiyanı sıxışdırıb çıxartmaq niyyəti güdür. KTMT-nin (Kollektiv Təhlükəsizlik Müqaviləsi Təşkilatı) Ermənistana ezam olunması nəzərdə tutulan missiyadan İrəvan nümayişkəranə imtina etdi və Aİ missiyasını ölkəsində böyük həvəslə qəbul edir. Ermənistan geosiyasi ziddiyətlərin və konfrantasiyaların bir məkanına çevrilir.

Məhz bu xüsusda Rusiya tərəfindən də Ermənistanı qınayan bir sıra fikirlərə rast gəlirik. Hətta Rusiyanın XİN başçısı Sergey Lavrov da bu məsələyə münasibət bildirib. Belə görünür ki, Ermənistanda hazırda siyasi iqtidar öz mövcudluğunu qoruyub saxlamaq naminə ölkəsini geosiyasi problemlər məkanına çevirməkdədir və addım-addım buna doğru irəliləyir.

Eyni zamanda bu yaxınlarda Avropada səfərdə olan və Azərbaycan əleyhinə çıxışlar edən Ermənistanın Xarici işlər naziri Ararat Mirzoyanın Rusiya əleyhinə də iş aparması müşahidə olunurdu. Onun Sorosun yetirməsi olması və Sorosdan gələn təlimatlar əsasında müxtəlif missiyalarda iştirak etməsi, bura cəlb olunması həm də hazırki Ermənistan hakimiyyətinin Rusiya əleyhinə mövqeyinin bariz nümunəsidir".

Təhməz Əsədov Son.az