"Qəbul edilmiş prinsiplər çox aydın və birmənalıdır. Bunlar silahların yerə qoyulması, terror təşkilatlarının ləğv olunmasıdır. Əsas məqsədimiz PKK, PYD, YPG terror təşkilatlarının bölgədə sabitliyi pozmasına yol verilməməsidir".

Ö.Çelik qeyd edib ki, rəsmi Ankara prosesi diqqətlə izləyir: "Diqqətli olmalıyıq. Bölgədə terrora son qoymaq üçün bəzi dövlətlərin təxribat cəhdlərinin qarşısı alınacaq".

Bəs bu danışığa əsasən Türkiyənin terrorla mübarizəsində yeni mərhələsi demək olar? 

Son.az xəbər verir ki, məsələni siyasi şərhçi Kənan Novruzov təhlil edib:

"Məlum olduğu kimi, PKK terror təşkilatının həbsdə olan lideri Abdullah Öcalan bir neçə gün əvvəl tərəfdarlarına müraciət edərək silahı yerə qoymalarını bildirdi. Bundan sonra sonra digər terror təşkilatları da Öcalanın çağırışına qoşuldu. Ardınca isə PKK terror təşkilatı Kandildə atəşkəsin elan edildiyini bildirdi. Türkiyə özünün təhlükəsizliyi naminə uzun illərdir ki, terrorla mübarizə aparır. Bu mübarizə həm ölkə daxilində, həm də Suriya və İraqda özünü göstərir. Xüsusilə son illərdə Türkiyənin terrorla mübarizəsində ciddi nəticə əldə olunub. Suriyada Bəşər Əsəd rejiminin devrilməsi ilə rəsmi Ankara üçün bu istiqamətdə tamamilə yeni mərhələ başlanıb.

Əvvəl də dediyimiz kimi, indiyə kimi Türkiyənin terrorla mübarizəsinə mane olan əsas məqamlardan biri məhz Əsəd rejimi idi. Suriyadakı hakimiyyət dəyişikliyi Türkiyənin əlini gücləndirdi. Sözsüz ki, Öcalanın çağırışında və fərqli terror təşkilatlarının pozitiv mesajlarında bu məsələnin də xüsusi rolu var.

Eyni zamanda Türkiyə ilə ABŞ arasında hansısa gizli, hələlik ictimaiyyətə açıqlanmayan razılığın əldə olunması da mümkündür. Əgər belədirsə, yəqin ki, Vaşinqton- Ankara xəttində yeni tendensiyaların şahidi olacağıq".

O bildirib ki, mümkündür ki, "sular asanlıqla durulmasın". Çünki PKK, YPG sadəcə terror təşkilatları deyillər, həm də ideologiyadırlar. Bu baxımdan bu və ya digər formada qısa müddət sonra yeni hərəkətlənmənin müşahidə olunması mümkündür.

"Terrorçular özbaşına deyillər. Onlar bu və ya digər ABŞ - dan idarə olunurlar. Bu mənada PKK, YPG- nin bundan sonrakı fəaliyyəti xeyli dərəcədə ABŞ-nin mövqeyindən və Türkiyə ilə münasibətlərdən asılı olacaq. Ö.Çeliyin dediyi kimi, regionda terror təhdinin tam aradan qalxmasında maraqlı olmayan güclər var. Onlar bunun üçün bütün mümkün vasitələrdən istifadə edəcəklər. Ancaq Türkiyə terrora tamamilə son qoymaqda qərarlıdır. Ankara bunun üçün həm hərbi, həm də diplomatik səylərini ortaya qoyacaq".

Aysel Əkbər Son.az