"30 ildir yada düşməyən adamı birdənbirə Milli Məclis yada salır" Cahangir Novruzovla

Şou-biznes 12 Apr 2025 19:46:00 91 0

"Əgər mənim gücüm, bacarığım, istedadım Azərbaycan mədəniyyəti üçün az da olsa xeyirli olacaqsa, bundan ancaq xoşbəxt ola bilərəm".

Bunu Oxu.Az-a müsahibəsində Xalq artisti Cahangir Novruzov deyib.

- Cahangir müəllim, ötən gün Milli Məclisdə sizin ölkəyə qayıtmanız təklif olunub. Bu xəbəri necə qarşıladınız?

"Bu məsələ mənim üçün nəinki xoş, hətta gözlənilməz bir fəxrdir. Əgər Vətənimin, millətimin Milli Məclisində haqqımda danışılırsa, bu, mənim xalqım üçün, millətim üçün, Azərbaycan mədəniyyəti üçün bir anlam kəsb etməyim deməkdir. Bundan ancaq qürurlanmaq, fəxr etmək olar. Hətta xəbəri birinci dəfə oxuyanda yoldaşım dedi, sən niyə qızardın belə? Dedim, əsəbiləşmədim, utandım. Təsəvvür edin ki, 30 ildir yada düşməyən bir adamı birdən-birə Milli Məclis yada salır. (gülür)

Həmişə dediyim bir söz var - mən də Azərbaycanın bir əsgəriyəm. Harada lazımamsa, Vətənim məni istəyirsə, oraya getməyə, baş qoymağa hazıram. Bu gün həqiqətən lazımamsa, rəsmən müraciət edərlər, oturub ciddi söhbət edərik. Əgər Vətənimdə mənə ümid bəsləyirlərsə, demək ki, gələndə orada nələrsə etməliyəm. Mən vəzifə həvəskarı olmamışam, deyiləm də. Amma bəzi reallıqlar var.

- Məsələn, hansı reallıqlar?

- Məsələ burasındadır ki, zamanla dağılanları birdən-birə tək adam qura bilməz. Əgər mənim ağlıma inanırlarsa, istər media, istər Mədəniyyət Nazirliyi və digər bu işə məsul strukturlar, hətta lazım olarsa, dövlətimizin, Prezidentimizin də dəstəyi ilə əl-ələ verib Azərbaycan teatrının inkişaf proqramını hazırlamalıyıq.

- Cahangir müəllim, belə anladım ki, əgər sizinlə bu məsələləri danışsalar, sizi yenidən səhnəmizdə görə biləcəyik. Düz anladım?

- Bilirsiniz ki, artıq 30 ildir Türkiyədəyəm. Demək olar burada kök salmışam. Nəvələrim burada oxuyurlar, yaşayırlar, işləyirlər. Özümün burada qurduğum bir sistem var. Yəni bildiyiniz-bilmədiyiniz bir çox şeylər var ki, bunların hamısını düşünməliyəm, götür-qoy etməliyəm. Əgər bu söhbətimiz 20 il bundan əvvəl olsaydı, mən yəqin ki, bu qədər dərinə getməyə ehtiyac bilməzdim.