Son.az AA-ya istinadla xəbər verir ki, İstanbul Respublika Baş Prokurorluğu tərəfindən vəzifəsindən uzaqlaşdırılan İstanbul Böyükşəhər Bələdiyyə Başçısı Ekrem İmamoğlu və daha 99 şübhəli barəsində "cinayət təşkilatına rəhbərlik etmək", "cinayət təşkilatına üzv olmaq", "rüşvət alma", "rüşvət vermə", "dələduzluq", "şəxsi məlumatları qanunsuz yolla əldə etmək" və "tenderlərə müdaxilə etmək" kimi maddələrlə aparılan istintaq davam edir.

İstanbul Böyükşəhər Bələdiyyəsinə qarşı aparılan korrupsiya istintaqı çərçivəsində şahid qismində ifadəsi alınan A.Ş, 2019-2023-cü illər arasında "Sev Reklam Şirkəti"ndə direktor kimi işlədiyini bu şirkətin sahiblərinin Alihan Aydın, Alper Aydın və Ahmet Uruç olduğunu deyib. O bildirib ki, işlədiyi dövrdə bu şirkətin İBB-dən heç bir tender almasına şahid olmayıb və 2023-cü ildə işdən ayrılaraq öz şirkətini qurub. A.Ş əlavə edib ki, ayrıldıqdan sonra həmin şirkətin İBB və ya ona bağlı qurumlardan tender alması mümkündür, lakin bu barədə məlumatı yoxdur.

İfadə verən başqa bir şahid, keçmiş sürücü O.C. isə 2019-cu ildə Ekrem İmamoğlu bələdiyyə sədri seçildikdən sonra Kültür AŞ-də müqaviləli dövlət qulluqçusu kimi işə başladığını və Serdal Taşkının 2 il sürücüsü olduğunu deyib. Taşkının sürücüsü olduğu dövrdə daim onunla olduğu üçün kimlərlə görüşdüyü və harada toplantılar keçirdiyi barədə geniş məlumata sahib olduğunu deyib. Onun sözlərinə görə, Serdal Taşkın İmamoğlunun komandasında yer alan Murat Ongun, Murat Kapki, Hüseyin Köksal, Necati Özkan və Fatih Keleşlə birlikdə hər həftə azı iki dəfə Beylikdüzü "Mado" kafesinin aşağı mərtəbəsində, ictimaiyyətə bağlı olmayan otaqda toplantılar keçirirdilər. O.C bu müddətdə Hüseyin Köksalın sürücüsü Servet adlı şəxslə çöldə gözlədiklərini bildirib.

O.C ifadəsində qeyd edib ki, bu toplantılarda açıq hava reklamları, tender və qeyri-qanuni işlərlə bağlı məsələlər müzakirə olunurdu. Toplantılardan sonra Murat Ongun və Serdal Taşkın əllərində içində pul olduğuna inandığı çantalarla çıxırdılar. Bəzi hallarda bu çantalar Taşkının Nişantaşı Vakıfbank filialındakı şəxsi seyfinə yerləşdirilirdi. O.C həmçinin bildirib ki, ailəsinin sarraf və valyutadəyişmə işi ilə məşğul olması və Kapalıçarşıda çevrəsinin olması səbəbilə Taşkına valyuta və qızıl alarkən yardımçı olub. Bu gizli Mado görüşlərindən başqa, Ekrem İmamoğlunun şəxsən qatıldığı, eyni şəxslərin iştirak etdiyi digər görüşlərin də Hüseyin Köksalın Beylikdüzündəki tekstil fabrikində həftədə iki dəfə keçirildiyini deyib. O.C, bu görüşlərdən sonra da iştirakçıların əllərində çantalarla çıxdıqlarını və yenə qanunsuz tender və digər hüquqa zidd işlər barədə danışdıqlarına şahid olduğunu vurğulayıb.

O.C, sürücü kimi çalışdığı iki il ərzində hər gün belə işlərin müzakirə olunduğunu, çoxsaylı qeyri-rəsmi toplantı və söhbətlərin keçirildiyini, eyni zamanda komissiya alındığını gördüyünü bildirib. Onun sözlərinə görə, Ekrem İmamoğlunun göstərişi ilə Murat Ongun və Serdal Taşkının təşkilatçılığı altında, əvvəldən adları çəkilən şəxslər vasitəsilə bu qanunsuz tender və komissiya işləri həyata keçirilirdi. O.C qeyd edib ki, Taşkının şəxsi sürücüsü və rəsmi tədbirlərdə iştirak edən biri kimi bu proseslərin bir çoxuna şəxsən şahid olub. Həmçinin, mətbuata da mövzu olan və İmamoğlunun pullarının Taşkına daşıdıldığı hallarda bu pulların yerləşdiyi çantaların avtomobildə olduğunu öz gözləri ilə gördüyünü bildirib. O əlavə edib ki, bu gizli görüşlər əsasən gecə saat 23:00-dan 01:00-a qədər keçirilirdi.

İstanbul Böyükşəhər Bələdiyyəsinə (İBB) qarşı aparılan korrupsiya istintaqı çərçivəsində şahid qismində danışan O.S, "Popüler Medya" şirkətinin sahibi olduğunu və qardaşı E.S ilə 2019-cu il bələdiyyə seçkilərinə qədər birlikdə çalışdıqlarını bildirib. O deyib ki, seçkilərdən sonra qardaşı metro və rəqəmsal panel reklam işi üzrə böyük yatırım etsə də, bu iş qısa müddət sonra İBB-yə bağlı şirkət vasitəsilə İlbak Holdinqə verilib. O.S, qardaşına hüquqi yolla haqqını tələb etməyi tövsiyə etsə də, onun bələdiyyədən çəkindiyini və sükutla razılaşdığını bildirib.

O.S həmçinin qeyd edib ki, Ekrem İmamoğlu bələdiyyə başqanı olduqdan sonra reklam icazəsi alma prosesi çətinləşdirilib və bəzi şirkətlərdən qeyri-rəsmi ödənişlər tələb olunub. Öz şirkəti adından etdiyi icazə müraciətlərinin hamısının rədd edildiyini bildirən O.S, bəzi reklam yerlərinin qanunsuz şəkildə bələdiyyəyə yaxın şirkətlərə verildiyini, buna isə formal olaraq "ecrimisil" (qanunsuz istifadə üçün cərimə) yolu ilə hüquqi don geyindirilməyə çalışıldığını söyləyib. O, bu iddiaları sübut edən sənədləri yaxın günlərdə prokurorluğa təqdim edəcəyini də açıqlayıb.

İslam Son.az