Son.az müsahibəni təqdim edir:

-Pərvanə xanım, xəyanəti bağışlamaq olarmı? Əlbəttə ki, söhbət istənilən xəyanətdən gedir..

-Heç vaxt xəyanəti bağışlamaq olmaz. İstər vətənə xəyanət, istər dosta, istər doğmalarına, istərsə də kişinin qadına etdiyi xəyanəti heç cür bağışlamaq olmaz. Xəyanət adı üstündə xəyanətdir. Özü də böyük hərflərlə yazılır. Mən şəxsən xəyanəti heç vaxt bağışlaya bilmirəm. Təbii ki, düşmənçilik etmirəm, heç kimə pislik arzulamıram, bunu heç bacarmıram da. Amma bağışlamıram. Həmin insanları beynimdən də, ürəyimdən də tam silirəm. Mənə elə gəlir ki, hamı da mənim kimidir. Heç kim xəyanəti bağışlamır.

-Bu sualı sizə ünvanlamağım təsadüfi deyil. Sizi tamaşaçılar bu mövsümdən "Xəyanət" serialında izləyirlər. Hər mövsüm bir məşhur serialla izləyicilərin qarşısında olursuz. Bu ekran işi sizə bir daha nəyi aşıladı?

-"Xəyanət" mənə çox şeyləri aşıladı. Yeni sevgiləri, tanışlıqları, insanları aşıladı. Böyük bir kollektivlə çalışdım, onları sevdim. Mən keçən il "Xəyanət" serialına baxmırdım. Bilmirəm ki, hadisələr hansı yöndə inkişaf edib, necə olub? Əlbəttə ki, işimlə əlaqədar olaraq baxa bilmirdim. Mən də seriala çəkilirdim, ona görə izləyə bilmirdim. "Xəyanət" kollektivində sənətçilərin bir-birinə böyük dəyəri var.

-Sizcə tamaşaçılar seriallarda, filmlərdə kimləri görmək istəyir?

-Bu sualı tamaşaçılarımıza ünvanlasaq daha yaxşı olar. Çünki onlar bunu daha yaxşı bilirlər. Təbii ki, tamaşaçı yaxşı iş görmək istəyir. Həmin işlərdə də peşəkar aktyor və aktrisaların çəkilməsini arzulayır.

-Tamaşaçı süni və təbii sənətçini ayırd edə bilirmi?

-Əlbəttə ki, ayırd edə bilir. Tamaşaçını aldatmaq heç cür mümkün deyil. O qədər informasiya bolluğu var ki. Bu dəqiqə canlı olmayan nələrisə süni intellekt vasitəsilə yaratmaq mümkündür. Amma canlı tamam başqadır. Buna görə də aktyorun təbii və süni oynamağı həmin an görünür. Təbii ki, tamaşaçı tərəfindən də qiymətləndirilir.

-Sənət aləmində "Gəncənin aktyorları yaman seriallardaa çəkilir, hər yanı zəbt ediblər" deyə dillərdə sözlər gəzir. Bu kimi ifadələrə münasibətiniz necədir?

-Biz də Azərbaycan Respublikasının vətəndaşıyıq. Biz də Azərbaycan teatr və kinosuna xidmət edirik. Sənətdə canımızı qoyuruq. Nə fərqi var ki? Gəncə Azərbaycanın döyünən bir ürəyi, köklü şəhəri deyilmi? Gəncə Azərbaycan teatrına və kinosuna korifeylər bəxş etməyibmi? Biz çəkicimizi bir yerə vururuq. Əgər bu sözü kimsə deyirsə, o nə torpağını, nə vətənini, nə də sənətini sevir. Yəqin ki, onu deyən adam özü heç kimdir. Heç bu adı daşımağa da layiq deyil ki, belə bir söz deyir. Son.az