Səhiyyə Nazirliyi iki ildən çoxdur ki, tibb işçilərinin peşəkarlığının qiymətləndirilməsi ilə bağlı yeni layihələr hazırlayıb və aidiyyəti qurumlarla razılaşdırıb.

Son.az xəbər verir ki, bu barədə Səhiyyə Nazirliyinin İnsan resursları, elm və təhsil şöbəsi müdirinin müavini Təranə Əhmədova Milli Məclisin Əmək və sosial siyasət komitəsinin iclasında danışıb.

İclasda "Əmək Məcəlləsi", "Əhalinin sağlamlığının qorunması haqqında", "Özəl tibb fəaliyyəti haqqında" və "Dərman vasitələri haqqında" qanunlara təklif edilən dəyişikliklər müzakirə olunub.

Təranə Əhmədovanın sözlərinə görə, əvvəllər tibb mütəxəssisləri hər 5 ildən bir dövri imtahanlarla qiymətləndirilirdisə, indi bu yanaşma dəyişdirilir və davamlı peşəkar inkişaf modeli təklif olunur:

"Bu yeni sistem həkimlərin, orta tibb işçilərinin və əczaçıların bilik və bacarıqlarını mütəmadi olaraq yeniləməsinə imkan verəcək. Sertifikasiya imtahanlarının formatı da dəyişəcək - test sualları yenilənəcək və çətinlik səviyyəsinə görə sadə, orta və mürəkkəb kateqoriyalara ayrılacaq".

Eyni zamanda, davamlı tədris tədbirlərinə veriləcək kreditlərin müəyyən olunması və akkreditasiyası ilə bağlı məsələlər də yenidən tənzimlənəcək. Bu proses Səhiyyə Nazirliyinin Elmi Tibbi Şurası tərəfindən həyata keçiriləcək.

Təranə Əhmədova qeyd edib ki, tibb işçilərinə veriləcək kredit ekvivalentləri onların fəaliyyət istiqamətindən asılı olaraq fərqli olacaq. Məsələn, elmi fəaliyyət sahəsində çalışanlar üçün bu kreditlər daha yüksək müəyyən ediləcək.

O da vurğulanıb ki, yeni sistem özəl və dövlət tibb sektorunda çalışan bütün mütəxəssislərə şamil olunacaq və heç bir fərqləndirmə olmayacaq.

Kənan Son.az