Son.az qafqazinfo.az-a istinadən xəbər verir ki, bu qərar işdə zərərçəkmiş qismində tanınmış Mədəniyyət Nazirliyinin etirazı əsasında çıxarılıb.

64 yaşlı Lalə Zakirova təhsil mərkəzinə ayrılmış 32 min 215 manat dövlət vəsaitini mənimsəməkdə təqsirli bilinib. O, birinci instansiyada özünü təqsirli bilməsə də, barəsində həbsli axtarış qərarı çıxarılandan sonra ziyanı tam ödəyib. Bundan əlavə, cinayət məsuliyyətindən azad edilməsi üçün dəymiş ziyanın 50 faizi miqdarında - 16 min 107 manat dövlət rüsumu verib.

Cinayət Məcəlləsinin müvafiq maddəsinə görə, mənimsəmə və dələduzluq hallarında dəymiş ziyan tam ödənildikdə və dövlət rüsumu keçirildikdə təqsirləndirilən şəxs barədə cinayət işinə xitam verilərək məsuliyyətdən azad edilə bilər. Günümüzdə məhkəmələrdə bu cür hallar kifayət qədərdir.

Lakin Lalə Zakirovanın işində vəziyyət fərqli olub. Mədəniyyət Nazirliyinin nümayəndəsi məhkəməyə göndərdiyi ərizədə təqsirləndirilən şəxslə barışmadıqlarını bildirib.

Müdafiə tərəfi isə nazirliyin bu mövqeyi ilə razılaşmayıb. Vəkil hüquqi şəxsin etirazının başadüşülən olmadığını deyib: "Zərərçəkmiş qurumun hansısa məmurunun şəxsi ambisiyası nəticəsində dövlət büdcəsinə ödənilmiş 16 min manat pul niyə geri qaytarılmalıdır? Bundan əlavə, qanunda hüquqi şəxslə təqsirləndirilən şəxs arasında barışıq əldə edilməsi anlayışı yoxdur".

Lalə Zakirovaya daha əvvəl sanksiya həddindən aşağı cəza təyin olunaraq 3 il 6 ay azadlıqdan məhrumetmə cəzası verilmişdi. Amma hökm elan olunmazdan əvvəl o, məhkəmə zalından qaçmışdı. Həbsli axtarışda olan xanım müttəhim apellyasiya məhkəməsində iştirak edib. O, ziyanı tam ödədiyini və dövlət rüsumunu keçirdiyi üçün cinayət işinə xitam verilməsini xahiş edib.

Hökmdən eyni zamanda prokuror da protest verib. İttiham tərəfi zərərçəkmiş şəxsin barışmamasını da nəzərə alaraq təqsirləndirilən şəxsin sanksiya həddində, yəni 5 ildən 10 ilə kimi həbslə cəzalandırılmasını tələb edib.

Sumqayıt Apellyasiya Məhkəməsi tərəfləri dinlədikdən sonra yekun qərarını elan edib. Hakimlər təqsirləndirilən şəxsin yaşını və dəymiş ziyanın tam ödənilməsini nəzərə alaraq onu həbsə göndərməyi ədalətli hesab etməyiblər.

Qərara əsasən, Lalə Zakirovaya 5 il müddətinə şərti cəza verilib. Həmçinin, onun cinayət işinə xitam verilməsi üçün ödədiyi 16 min 107 manat pul zərərçəkmiş nazirliyin "barışıq yoxdur" ərizəsi nəzərə alınaraq dövlət büdcəsindən özünə geri qaytarılacaq.