Son.az "Report"a istinadən xəbər verir ki, bu barədə "Agence France-Presse" (AFP) məlumat yayıb.

Üsyançıların qurduğu Vətənin Qurtuluşu Milli Şurasının nümayəndəsi polkovnik Amadu Abdramanın sözlərinə görə, Fransa "Nigerə qarşı təcavüzə hazırlıq çərçivəsində" Qərbi Afrika Dövlətlərinin İqtisadi Birliyinə (ECOWAS) üzv bəzi dövlətlərdə qüvvələr yerləşdirməyə davam edir.

Xatırladaq ki, Fransa tərəfinin iyul çevrilişindən sonra devrilmiş Prezident Məhəmməd Bazuma dəstək verməsindən sonra Niameyin Parislə münasibətləri sürətlə pisləşib. Niger 1960-cı ilə qədər Fransanın müstəmləkəsi olub.

Üsyançılar daha öncə də Fransanı müdaxilə hazırlamaqda ittiham ediblər, lakin rəsmi Paris bunu təkzib edib. Avqustun 22-də "Radio Algeria" Fransanın Nigerdə hərbi əməliyyat keçirmək üçün Əlcəzairin hava məkanına çıxış tələb etdiyini, lakin Əlcəzairin bundan imtina etdiyini açıqlayıb. Paris bu məlumatı da təkzib edib. Bununla belə, Fransa Prezidenti Emmanuel Makron Nigerdə hərbi əməliyyat olacağı təqdirdə ECOWAS-a dəstək verməyə hazır olacağını deyib. Təşkilat orada konstitusiya quruluşunu bərpa etmək üçün ölkəyə qoşun yeritmək məsələsini müzakirə etsə də, indiyədək bu məsələ ilə bağlı heç bir qərar verilməyib.

Nigerdəki xunta mümkün hücumla əlaqədar ordunu hazır vəziyyətə gətirib və "könüllü səfərbərlik" elan edib. Bundan əvvəl çevrilişlərin də baş verdiyi Burkina-Faso və Mali üsyançılara dəstək verəcəklərinə söz verib.

Çevrilişdən sonra Niger Fransa ilə bütün hərbi müqavilələri pozub. Afrika ölkəsinin Ali Məhkəməsi səfir Silven İtteni diplomatik toxunulmazlıqdan məhrum edib və onun dərhal ölkədən çıxarılmasını təsdiqləyib. Sentyabrın 5-də "Le Monde" mənbələrə istinadən yazıb ki, Paris Niger xuntası ilə qoşunlarının bir hissəsinin ölkədən çıxarılmasını müzakirə etməyə başlayıb. Afrika ölkəsindəki üç bazada təxminən 1 500 fransalı hərbçi mövcuddur. Rəsmi Paris əvvəllər belə bir ehtimalı istisna edirdi.

Son.az