Azərbaycanın İsraildə səfirlik açmasından sonra daha da qızışan molla rejimi Bakıya təhdid mesajları göndərməkdən daşınacaq kimi görünmür. Tehranda səfirliyimizə terror hücumunda əli olduğu ilə bağlı tutarlı məlumatlar, kadrların olduğu iran rejimi bu günə kimi həmin hadisəylə bağlı ədalətli bir qərar verməməklə bütün şübhələrin əsaslı olduğunu təsdiqləyir. Bu azmış kimi, paytaxt Bakıda hipermarketə edilən növbəti silahlı hücumda da iran izlərinə rast gəlindi.

Son olaraq millət vəkili Fazil Mustafanın hədəf seçilərək güllələnməsi isə Azərbaycana bütün iddia və şübhələrin məhz İrandan yana qaynaqlandığını müxtəlif faktlarla təsdiqləmiş oldu. Fazil Mustafaya qarşı terror hücumunu törətməkdə şübhəli bilinən şəxslər iki gün əvvəl saxlanıldı və onların İranla bağlantılarına dair müəyyən detallar ortaya çıxdı.

Hücumda İran izi ən çox ehtimal edilən versiyadır və hadisənin motivlərindən tutmuş hədəfinə qədər əksər detal diqqəti Tehranın üzərinə yönəldir. Terror aktının bir nəfər tərəfindən yox, qrup şəkilində təşkil edilməsi və qrupa bağlı digər şəxslər haqda araşdırmanın davam etməsi "İranın Azərbaycanda göstəriş gələndə silahlı hücumlar təşkil etmək potensialına malik dəstələrinin olduğu" fikrini təsdiqlədi.

Belə görünür ki, İran rejiminin növbəti hədəfi məhz Təbrizdəki Azərbaycan konsulluğudur. Azərbaycanın İsraildə səfirlik açmasından sonra konsulluğumuz əsas hədəf götürülüb kimi görünür. Azərbaycanın Təl-Əvivdə səfirlik açmasına etiraz olaraq, Tehran rejimi Təbirzdəki konsulluğun qarşısında "bağlansın" tələbi ilə aksiya təşkil etdi:

Molla rejimi bununla "Azərbaycanı Təbrizdə də istəmirlər" görüntüsü yaratmaqla Bakını inandırmaq istəyir ki, güneyli soydaşlarımız Azərbaycanı istəmir və onlar İrana qarşı mübarizədə Azərbaycanın yanında yer almayacaqlar. Bununla da Bakı əlini Güneydən üzsün, güneyli soydaşlarımız isə ümidini Bakıdan.

Belə olan təqdirdə molla rejimi ayrılıqda həm daxildəki soydaşlarımıza qarşı daha rahat mübarizə aparıb, onların bütün çıxış imkanlarını məhdudlaşdırmaqla deportasiyasını, soyqrımını bu və ya digər yollarla həyata keçirməklə Azərbaycanın genefonduna böyük zərbə vurmaq barədə düşünə bilər, həm də 30 milyonun dəstəyindən məhrum olan Azərbaycanla daha rahat şəkildə mübarizə aparmaq barədə planlar qurmuş ola bilər. 

Bu məqsədlə İran hər iki "cəbhədə" gərgin məkirli fəaliyyətlə məşğuldur. Azərbaycan daxilində İran agenturası olduqca fəallaşıb. Digər yandan molla rejimi Bakının fikrini digər məsələlərlə qatıb, daxildə növbəti terror hazırlığı görmək üçün müxtəlif səpkili gedişlər də edir:

1. Sərhəddə yenidən ağır artileriya, silah-sursat daşıyır

2. Təbrizdəki Baş Konsulluğumuzun önündə "Bağlansın" şüarı ilə aksiya azlıq edirmiş kimi, indi də binanın qarşısına "Hüseyniyyun" terror təşkilatının bayraqları düzülüb. Keçmiş Azərbaycan vətəndaşlarının SEPAH-ın dəstəyi ilə yaratdığı "Hüseyniyyun" terror qruplaşmasının fəallaşması da İranın konsulluğumuza qarşı təxribatları terror mərhələsinə keçirə biləcəyi gözləntisini daha da artırır.

Bu o demək deyil ki, İran rejimi bunu sadəcə görüntü xatirinə edir. Azərbaycanda İŞİD terrorçularının olduğu ittihamı ilə günlər öncə əsassız çıxışıyla yadda qalan SEPAH generalının həmin bəyanatı böyük ehtimalla Azərbaycana qarşı, Azərbaycanla sərhədlərdə hərbi əməliyyatlara zəmin hazırlamaq məqsədilə molla rejiminin planlaşdırdığı bir seçim ola bilər. Yəni İran eynilə Yaxın Şərqdəki proksi qüvvələri vasitəsilə, bu azmış kimi, hətta rəqabətdə olduğu PKK və İŞİD terrorçuları ilə sövdələşmələrə gedərək Cənubi Qafqazda suyu bulandırma, Azərbaycanı cəzalandırmağı ağlından keçirdiyi şübhə doğurmur.

Təəssüf ki, bu gün beynəlxalq oyunçular arasında Amerikanın mövqeyini ürəkaçan hesab etmək olmaz. Hətta İsrail mediası "Axios"un məlumatına görə Bayden İrana yeni bir müvəqqəti nüvə anlaşması təklif etməyə hazırlaşır. Yeni təklifə əsasən İran nüvə proqramının bəzi hissələrini dondurmalıdır, əvəzində isə İrana qarşı  sanksiyalar yumşaldılacaq. Daha sonra uzunmüddətli nüvə sazişi barədə müzakirələr aparılacaq. 

Demokratların İrana qarşı hərbi müdaxilə həvəsində olmadığı hər ötən gün özünü daha çox təsdiq edir. İsrail İranın nüvə silahı əldə edəcəyi halda müharibə başladacağını elan edib. Bayden hökuməti Yaxın Şərqdən "canını qurtarıb" Çinlə mübarizəyə, yəni Şərqi Asiyaya keçmək istəyindədir. Belə bir vəziyyətdə, Vaşinqton qarşısında ən əlverişli yolu İranın nüvə proqramını diplomatiya yolu ilə dayandırmaqda görür. Bayden bu yolu sona qədər yoxlamaqda israrlı təəssüratı bağışlayır. 

ABŞ həmişəki kimi öz maraqlarını coğrafiyaların taleyindən, onların təhlükəsizliyi məsələsindən vacib hesab etdiyi üçün bu gün Azərbaycanın yerləşdiyi regionda hadisələrə çox da müdaxilə etmək, Tehranın dikbaş siyasətinə adekvat reaksiyalar göstərməkdən bir qədər uzaqdır. Vaşinqton Yaxın Şərqdən uzaqlaşmaq üçün İranı qapı gördüyü üçün, indiki situasiyada ABŞ-ın istəyi molla rejimini, İranın məqsədi də Ağ Evi bir o qədər narahat edir kimi görünmür. 

Lakin hadisələr heç də hər şeyin məhz İranın istədiyi kimi yekunlaşacağı anlamına gəlmir. Çünki bu gün dünya çapında səsini duyura bilən, sözünü deyən bir Azərbaycan və onun güclü ordusu var. Xalq, dövlət, Ordu vəhdəti isə Azərbaycanın aşa bilməyəcəyi çay (Araz), maneə olmadığını artıq sübut edib. İran rejimi Bakını qısnamaq niyyətindən əl çəkməyəcəyi təqdirdə rəsmi Tehran Bakının daha sərt üzü ilə qarşılaşacaq. 

Təhməz Əsədov Son.az