Məktəbin rəhbər, müəllim və şagird heyəti Xocalı abidəsini ziyarət etdi, abidənin önünə gül dəstələri və əklil qoydular və Xocalı faciəsi zamanı həlak olanların əziz xatirəsinə hörmət nümayiş etdirdilər.

AAM-nin ibtidai korpusunda Xocalı şəhidlərinin əziz xatirəsinə ithaf olaraq Azərbaycan Respublikasının Dövlət himni səsləndirildi və onların əziz xatirəsi bir dəqiqəlik sükutla yad edildi. 

Sonra ibtidai sinif şagirdləri Xocalı faciəsinə həsr olunmuş əl işindən ibarət kompozisiya hazırladılar.

Avropa Azərbaycan Məktəbi və "Libraff" mağazalar şəbəkəsinin təşkilatçılığı ilə orta məktəb korpusunda Xocalı faciəsinin tarixinə işıq tutan təqdimat nümayiş etdirildi. 

Tədbir Azərbaycan Respublikasının Dövlət Himninin səsləndirilməsi ilə başladı. Ardınca Xocalı şəhidlərinin ruhu bir dəqiqəlik sükutla yad edildi. 

Daha sonra AAM-nin direktoru Françesko Bankini çıxış edərək öz düşüncələrini bölüşdü və şagirdlərə öz tövsiyyələrini verdi. 

Sonra bu tarixi faciənin şahidi və əslən Xocalıdan olan Avropa Azərbaycan Məktəbinin əməkdaşı Nəcibə Qasımovaya söz verildi. Nəcibə xanım bu qətliamın insanların taleyində və yaddaşında buraxdığı dərin yaradan danışaraq öz xatirələrini bölüşdü. Nəcibə xanım bildirdi ki, hər birimiz Xocalı faciəsinin ildönümünü şəhidlərin qisası alınmış və ərazi bütövlüyü bərpa edilmiş xalq kimi qeyd edirik. Sonda o bildirdi ki, sülh və əmin-amanlıq dolu bir dünyada yaşamaq üçün təhsilin və elmin əhəmiyyətli gücünə inanır və  xoş gələcək təhsilli şagirdlərin əməyi nəticəsində bərqərar olacaq. 

Ardınca Azərbaycan Milli Elmlər Akademiyasının əməkdaşı Leyla Babazadə şagirdlər üçün təqdimat edərək Xocalı faciəsinin tarixi, ermənilərin günahsız insanlara xüsusi qəddarlıqla divan tutaraq əsrin ən böyük faciələrindən birini törətməsi, faciə nəticəsində zərər çəkmiş insanların aqibəti, Xocalının işğal olunması, insanların öz yurd-yuvalarından didərgin salınması kimi məsələlərə toxunaraq qan yaddaşımız barədə onlara məlumat verdi. Şagirdlərimiz soydaşlarımıza qarşı törədilən qətliamın tarixini dinləyərək bir daha tarixi həqiqəti xatırlamış oldular. 

Sonda Leyla xanım müstəqil Azərbaycan Respublikasının vətəndaşları olaraq daha parlaq gələcək üçün əl -ələ verib birlikdə çalışmalı olduğumuzu ifadə etdi.

Xocalı soyqırımının 31-ci ildönümündə bir daha şəhidlərimzin ruhunu ehtiramla yad edirik...