Bəlli olduğu kimi, üç aya yaxındır ki, Azərbaycan vətəndaş cəmiyyətinin nümayəndələri Xankəndiyə gedən yolun üzərində post qurub. Bununla da Ermənistandan sülhməramlıların müvəqqəti nəzarətində olan əraziyə silah daşınmasının qarşısı alınıb. Lakin buna baxmayaraq qanunsuz silahlı birləşmə üzvləri yenə Qarabağa silah daşımağa cəhdlər göstərirlər, başqa variantları işə salırlar. Baş verən son silahlı toqquşma da bunun bariz nümunəsidir.

Maraqlı olan insidentdən dərhal sonra erməni tərəfinin qaldırdığı həyəcan və səs-küydür. Ənənəsinə sadiq qalaraq köhnə və istifadə olunan taktikadan yararlanmağa çalışırlar. Erməni mediası və telegram kanalları bir ağızdan Azərbaycanı etnik təmizləmə cəhdində və əldə olunan razılaşmaları pozmaqda ittiham etməyə çalışıb. Lakin ardınca da əsas hədəflərini açıqlayıblar - Azərbaycanla Ermənistan arasında sərhəd bölgəyə yerləşdirilən avropalı sülhməramlıların Qarabağa yerləşdirilməsinin zəruruliyini ortaya atıblar. Məsələn, "Bagramyan" telegram kanalında yerləşdirilən bir cümləlik xəbər belə başlayır - "Qarabağda avropalı sülhməramlıları yerləşdirilməsinin vaxtı çatıb". Digər media resursları isə Azərbaycan ekofəallarının keçirdikləri aksiyanı "növbəti erməni soyqırımına hazırlıq" kimi qələmə verməyə çalışıblar.

Beləliklə, baş verən isnident bir daha onu göstərir ki, Qarabağda gərginliyin səbəbi olan separatçı ermənilərin silahsızlaşdırılması tezliklə reallaşmalıdır, bölgədə Azərbaycanın nəzarət-mexanizm sistemi qurulmalıdır. Ən əsası Azərbaycan bölgədə alternativ yolları da nəzarət altına almalıdır.

Erməniləri özündən çıxaran həm də odur ki, insidentlə bağlı rəsmi məlumatı yayıldıqdan sonra Rusiyanın TASS agentliyi Azərbaycan Müdaifə Nazirliyinə istinad edib. Bu fakt da Ermənistanda və Qarabağ erməniləri arasında çox ciddi ajiotaj doğurub. Ənənəvi olaraq Rusiya sülhməramlıları və Moskva hakimiyyəti yenidən hədəfə alınıb.

Beləliklə, bütün bunlardan belə nəticəyə gəlmək olar ki, separatçılar bir həqiqəti getdikcə anlamağa başlayırlar - bölgədə qalıb yaşamaq istəyirlərsə, Azərbaycan qanunlarını qəbul etməlidirlər. Əks təqdirdə, buradan rədd olub getməli olacaqlar. 

Azər Nuriyev Son.az