Güclü külək Bakıda yeni tikilən binanın dəmir dam örtüklərini uçurub və bu da ətrafdakı insanlara təhlükə yaradıb.

"Report"un xəbərinə görə, hadisə Binəqədi rayonu, Süleyman Sani Axundov küçəsində baş verib.

Belə ki, ötən gecə güclü külək hələlik tikintisi tam başa çatmamış "Kristal Abşeron"a məxsus çoxmərtəbəli binanın damına vurulan dəmir örtükləri yerə dağıdıb. Dəmir örtüklər yoldan keçən avtomobillərin üzərinə düşüb. Bu da insanlar üçün ciddi təhlükə yaradıb, amma xəsarət alan olmayıb.

Hadisə yerinə Binəqədi Rayon Polis İdarəsinin əməkdaşları gəlib. Polis Şövkət Məmmədova küçəsi, o cümlədən Süleyman Sani Axundov küçəsinin hər iki tərəfində postlar qurub. Yolda avtomobillərin hərəkət istiqaməti dəyişdirilib. Yaxınlıqdan keçən insanlar polis müşayiəti ilə aparılıb.

Daha sonra hadisə yerinə binanın tikintisini aparan iş icraçıları gəlib. Usta və fəhlələr binanın damına çıxaraq çətinliklədə olsa təhlükənin qarşısını ala biliblər. 

İş icraçıları "Report"un hadisə yerindəki çəkiliş qrupuna mane olmağa çalışıb. Onlar "təhlükənin qarşısını qabaqcadan almaq olardımı" sualına belə cavab veriblər: "Təbii fəlakətdir belə olmalıdır".

Ətrafdakı binanın və şadlıq evinin həyətyanı sahəsinə düşən dəmir parçaları sakinlərin köməkliyi ilə təhlükəsiz yerə daşınıb.

Hadisə ilə bağlı Binəqədi Rayon Polis İdarəsində araşdırma aparılır.