Son hadisələrlə diqqət mərkəzinə gələn Venesuela prezidenti Nikolas Maduro Moros bu siyahıya daxil olub. Maduro 2013-cü ildən bəri Venesuelaya rəhbərlik etmişdi və 2025-ci ildə üçüncü dəfə prezidentlik andı içmişdi. Lakin 2026-cı il yanvarın 3-də keçirilən ABŞ xüsusi təyinatlıları əməliyyatı nəticəsində o və həyat yoldaşı Cilia Flores ələ keçirilib və ölkədən çıxarılıb.

Maduro ABŞ məhkəməsində cinayət ittihamları ilə üzləşir. Bu hadisə ölkənin tarixində devrilmiş prezidentlər kateqoriyasına daxil edilir və beynəlxalq münasibətlərdə geniş rezonans doğurur.

Bəs, tarix boyu hansı ölkə prezidentləri vəzifəsindən devrilib?

Zinəl Abidin Ben Əli (Tunis) 2011-ci ildə "Ərəb Baharı" dalğası ilə başlayan kütləvi etirazlar nəticəsində 23 illik hakimiyyət sona çatdı. Ben Əli ölkəni tərk etdi və Tunis regionda nisbətən uğurlu siyasi keçid yaşayan nadir ölkələrdən biri oldu.

Hüsnü Mübarək (Misir) 30 ilə yaxın hakimiyyətdə olan Mübarək 2011-ci ildə milyonlarla insanın qatıldığı etirazlardan sonra istefa verdi. Onun devrilməsi Misirdə siyasi sistemin köklü dəyişməsinə yol açdı.

Muəmmər Qəddafi (Liviya) 2011-ci ildə vətəndaş müharibəsi və NATO-nun müdaxiləsi nəticəsində devrildi və öldürüldü. Qəddafinin süqutu Liviyada dövlət institutlarının dağılmasına və uzunmüddətli qeyri-sabitliyə səbəb oldu.

Bəşər Əsəd (Suriya) Suriya prezidenti Bəşər Əsəd 2011-ci ildə başlayan xalq etirazları fonunda hakimiyyətini qorumaq üçün sərt hərbi tədbirlərə əl atdı. Etirazların vətəndaş müharibəsinə çevrilməsinə baxmayaraq, Əsəd rejimi Rusiya və İranın dəstəyi ilə uzun müddət hakimiyyətdə qaldı. 2024-cü il noyabrın 27-də "Heyət Təhrir əş-Şam" müxalifət birliyi genişmiqyaslı və sürətli hücuma keçib. "Heyəti Təhrir əl-Şam" silahlıları, onların müttəfiqləri olan Azad Suriya ordusu ilk günlərdə Suriyanın ən böyük şəhərləri Hələb və İdlibi, daha sonra Həma və Xümsü ələ keçirib. Dekabrın 8-də isə silahlı müxalifət Dəməşqə daxil olub və Əsəd rejiminə son qoyub. Bəşər Əsəd ailəsi ilə Moskvaya qaçıb və Rusiyadan sığınacaq alıb.

Viktor Yanukoviç (Ukrayna) 2014-cü ildə Avropa İttifaqı ilə yaxınlaşmadan imtina etməsi "Meydan" etirazlarına səbəb oldu. Yanukoviç ölkəni tərk etdi və parlament tərəfindən vəzifəsindən kənarlaşdırıldı.

Slobodan Miloşeviç (Serbiya/Yuqoslaviya) 2000-ci ildə seçkilərin saxtalaşdırılmasına qarşı etirazlar nəticəsində devrildi və sonradan Haaqa tribunalına təhvil verildi.

Alberto Fucimori (Peru) Korrupsiya qalmaqalları səbəbilə 2000-ci ildə istefa verdi və sonradan məhkum edildi.

Fidan Son.az