Son.az Hit.Az-a istinadən xəbər verir ki, tanınmış əttar və parfümeriya mütəxəssisi Türkan Alixanova ətir və parfümlərlə bağlı mühüm məqamları açıqlayıb. Onun sözlərinə görə, ətir insanın görünməyən imzasıdır və düzgün seçilmədikdə həm özünüz, həm də ətrafınızdakılar üçün narahatlıq yarada bilər.

"Ətir - buxarlandıqdan sonra qoxu hisslərimiz tərəfindən yaddaşımıza həkk olunan aromatik molekullardır. Parfüm isə suda və ya spirtdə həll olunmuş kompleks bir kompozisiyadır," - deyə mütəxəssis bildirir.

Qoxular və yaddaş: Emosional stimullaşdırma gücü

Türkan Alixanova qeyd edir ki, insanlar gündəlik emosiyalarının təxminən 75%-ni qoxular vasitəsilə yaşayır:

"Qoxu hissiyyatı bizim emosional yaddaşımızın əsas stimullarındandır. Ətirləri 1 il ərzində 70% dəqiqliklə xatırlamaq mümkündür. Bəzən cəmi 1 saniyədə hiss olunan bir qoxu illər əvvəlki bir anı və hissi canlandıra bilər".

Ətir - musiqi kimi kompozisiya

Alixanova ətirin quruluşunu musiqi ilə müqayisə edir. Onun sözlərinə görə, hər bir ətir üç əsas not üzərində qurulur və zamanla dəyişərək dəri üzərində fərqli mərhələlərlə açılır:

Üst notlar (ilk təəssürat): Çox tez buxarlanan, qeyri-sabit, ancaq ən vacib təsir buraxan hissədir.

Ürək notları (əsas ruh): Üst notlardan sonra ortaya çıxır. Daha stabil və orta davamlılığa malik qoxulardır.

Əsas notlar (vizit kartı): Ən qalıcı və dərin təsir yaradan qoxular bu mərhələdə ortaya çıxır. Dəri ilə uzun müddət qalan, insanın şəxsiyyətini tamamlayan hissədir.

"Ətirin bu notları bir-birindən tam ayrılmır. Onlar qarışır, bir-birinə reaksiya verir və nəticədə unikal bir parfümeriya əsəri meydana çıxır," - deyə əttar vurğulayır.

Ətirlərin növləri və konsentrasiyası

Alixanova eyni zamanda bazarda rast gəlinən parfümeriya məhsullarının tərkibindəki komponent fərqliliklərinə də aydınlıq gətirir:

Odekolon: Ən aşağı konsentrasiyalı ətir növüdür. (1-2%)

Eau Fraiche: "Təzə odekolon" kimi təqdim olunur. (3-6%)

Tualet suyu (Eau de Toilette): İncə qoxu sevənlər üçün ideal seçimdir. (5-10%)

Parfüm suyu (Eau de Parfum): Qalıcılığı daha yüksək, gündəlik istifadə üçün uyğundur. (10-18%)

Əsl ətir (Parfum): Ən yüksək konsentrasiyaya malik parfümeriya məhsuludur. (43-70%)

"Ətir seçərkən yalnız qoxuya deyil, həm də onun konsentrasiyasına diqqət yetirmək lazımdır. Yüksək konsentrasiyalı ətirlər daha bahalı və qalıcıdır, lakin onları istifadə edərkən miqdarına da nəzarət vacibdir," - deyə Türkan Alixanova tövsiyə edir.

P.S. Ətir sadəcə qoxu deyil, bir duyğudur. Onu seçərkən təkcə burnunuzu deyil, xatirələrinizi də dinləyin.