Son.az xəbər verir ki, verilişin qonağı Azərbaycanın Xalq artisti, professor, dünyaca məşhur dirijor Yalçın Adıgözəlov olub.

Regionumuzda baş verən hadisələri şərh edən maestronun sözlərinə görə, bu hadisələr hər bir insana təsir edir.

"Siyasət hər kəsə aiddir. Peşəsindən, məşğuliyyətindən və sosial statusundan asılı olmayaraq, siyasət ölkənin, xalqın, vətəndaşların, bəzən isə bütöv nəsillərin həyatını müəyyən edir", - o qeyd edib.

"Biz qlobal dəyişikliklər dövründə yaşayırıq. Bizim nəsil, həqiqətən, unikaldır və bizə tarixi bir missiya nəsib olub", - deyə maestro vurğulayıb.

"Son günlərdə biz Romada idik. Orada Azərbaycan diasporunun nümayəndələri ilə görüş keçirildi. Dünyanın müxtəlif guşələrindən mədəniyyət, incəsənət, musiqi, poeziya, rəssamlıq sahəsinin nümayəndələri gəlmişdi. Bu təkcə görüşlər deyil, bu bizim mədəni silahımızdır. Mədəniyyət Nazirliyi və Diasporla İş üzrə Dövlət Komitəsi Avropada yaşayan azərbaycanlıları birləşdirdi ki, onlar ictimai rəyə təsir edə bilsinlər. Ölkəmizin ədalətli mövqeyini tanıtmaq üçün daha çox dost və müttəfiq cəlb etmək həyati vacibdir", - deyə Yalçın Adıgözəlov əlavə edib.

"Qarşı tərəf mənasız bir yol seçib. Bu, vaxt itkisidir. Halbuki vaxt ən dəyərli resursdur. Onsuz da çox illər itirmişik", - o vurğulayıb.

"Bu gün Azərbaycan ən vacib məsələlərdən birini həll edə bilmiş bir ölkədir. Biz ədaləti bərpa etdik və bu, psixologiyamızı tamamilə dəyişdi. Ermənistan işğalı dövründə çoxlarımız içimizdə bir ağrı, sıxıntı hiss edirdik. Lakin indi başımızı yüksək tuturuq və bu, ölkə başçısının böyük işlərinin nəticəsidir. Həmişə Azərbaycan musiqisini fəxrlə təqdim etmişəm, amma indi bu hiss tamamilə yeni bir ölçü qazanıb", - Maestro ölkəsi haqqında qürurla deyib.

Azərbaycan-Ermənistan münasibətlərinə toxunan Xalq artisti əmindir ki, sülh mümkündür.

"Bir-birimizi görməzdən gəlmək və münaqişə atmosferində yaşamağa davam etmək çıxış yolu deyil. Təbii ki, Ermənistanda revanşist əhval-ruhiyyə mövcuddur, lakin cəmiyyəti sülhə hazırlamaq lazımdır. Dialoq olmadan gələcək qurmaq mümkün deyil", - deyə o bildirib.

Professor Yalçın Adıgözəlov Qarabağın qaytarılmasından xüsusi qürur hissi ilə danışıb.

"30 ildən sonra ilk dəfə Şuşa torpağına ayaq basanda nəfəsim kəsildi. Orada mənim ulu babam dəfn olunub, lakin mən 30 il onun məzarını ziyarət edə bilməmişdim. Neçə nəsil bu torpaqla bağlılığını itirə bilərdi? Biz bunun baş verməməsi üçün hər şeyi etdik", - o deyib.

Maestro bu Qələbənin dəyərini və onun hansı qiymətə başa gəldiyini xatırladıb.

"Bizim övladlarımız bu problemi bizim yerimizə həll etdi, biz hələ sağ ikən. Həmişə onların xatirəsi və ailələri qarşısında baş əyməliyik. Müharibəsiz bir mühitdə yaşayacaq gələcək nəsilləri görmək ən böyük xoşbəxtlikdir", - o qeyd edib.

Fikirlərini yekunlaşdıran Yalçın Adıgözəlov regionun işıqlı gələcəyinə əminliyini ifadə edib.

"Gec-tez biz əlaqələri bərpa edəcəyik. Bizim təbiətimiz, torpaqlarımız inkişaf, dostluq və sülh üçün yaradılıb. Başqa yol ola bilməz", - deyə o, sonda, vurğulayıb.