İnsan məişətdə, məhlədə, kənddə, qəsəbədə hamı ilə dost ola bilər. Amma siyasətdə hamı ilə dost olandan daha təhlükəlisi yoxdur.

Bəli 75 yaşlı deputat Vahid Əhmədov Mehman Hüseynovun "Sancaq"ına keçdi, özü də necə!

Onun sözügedən müsahibəsi bir daha təsdiq edir ki, Vahid Əhmədov hər zaman səmimiyyətdən daha çox, publikaya işləməyi yaxşı bilən, pafoslu çıxışları ilə cəmiyyətin gözündə öz timsalında qəhrəman yaratmaq cəhdini bir an olsun yerə qoymayan deputatlardandır.

Cəmi 3 deputatın halal yolla seçildiyini deyib. Seçkilərdə AXCP-nin, Müsavatın xalqdan səs ala biləcəyini söyləyib. İkisi də hazırkı siyasi konyukturaya uyğun sayılmır. Bir deputatın özünün də təmsil olunduğu Milli Məclisin tərkibinin legitimliyini şübhə altına alması düzgün yanaşma deyil. Belə danışan deputata cavab hər dəfə bu olur ki, xoşun gəlmir, mandatı qoy, get. Üstəlik bu fikir beynəlxalq mühitdə ölkənin ziyanına işləyir. Gərək Vahid Əhmədov heç olmasa danışanda bu nüansı mütləq nəzərə alardı.

Əhmədov onu da qeyd edir ki, Azərbaycanda bir məmur, oliqarx, inhisarçı üçbucağı var. Və bu üçbucağı elə izah edir ki, elə bil "Müfəttiş" əsərini Qoqol yox, o yazıb və müfəttişlərə necə "müfəttişlik" edib, rüşvət almağı öyrədir. Doğrusu, belə anlaşıldı ki, Vahid Əhmədov özü bu üçbucağın içərisindədir. Çünki o özü oliqarx hesab olunur - Baş nazirin birinci müavini olub, indi də millət vəkili. Bu şəxs biznes məsələlərini o qədər dəqiq bilir ki, yalnız bu işlərlə məşğul olan biri bu detalları bu qədər dəqiq bilə bilər.

Təbii ki, fərqli mülahizələr yürütmək, sərbəst fikirlər söyləmək, harada, hansı qütbdə qərarlaşacağını təyin etmək hər kəsin haqqı olduğu kimi elə Vahid Əhmədovun da haqqıdır. Ancaq və lakin heç kimə özünü qaldırmaq istədiyin yerdə tanıdığın, uzun illər bərabər çalışdığın insanları aşağılaya, yerin dibinə endirmək haqqı verilməyib.

"Mən seçilməsəm bölgə ayağa qalxar" klassik şantaj üslubundan istifadə edən, seçki orqanlarını hədələyən, üç-beş insanı tərifləmək üçün ən azı bir parlament insanı öz pafosunun güdazına verən bir şəxs bilməlidir ki, ona bu cür ikili oyun oynamaq səlahiyyətini, haqqını heç kim verməyib. 

Vahid Əhmədov qeyd edib ki, buradakı Milli Məclisdə 3 nəfərdən başqa hamı saxtakardır. Onu da qeyd edib ki, dövlətin yanındadır, Parlament də dövlətin bir qoludur. Adama deyərlər ki, bəyənmirsən, o zaman niyə oturursan? Həqiqətən vicdanın bu kimi şeylərə dözmürsə, o zaman mandatını qoy, get. Bunu edə bilmirsənsə, yediyin qaba tüpürməzdin bari. "Bir bezin qırağı deyilik" mənzərəsi yaratmaq, təəssürat formalaşdırmaq elə "təmsil etdiyin" (xalqa) insanlara uydurduğun ən böyük yalandır.

Cənab Əhmədov müsahibəsində çox qətiyyətlə və iradəli şəkildə bəyan edir ki, bəs dövlət məmuru ilə deputatın biznesi ola bilməz. Daha doğrusu, məmur və ya deputat vəzifəsindən sui-istifadə edərək biznes maraqlarını təmin etməməlidir.

Tamamilə haqlıdır, qanunlarımız da bunu deyir.

Lakin həmin kəlmələr V.Əhmədovun ifasında ironik təsir bağışlayır. Çünki ədalət carçısı, haqq və ədalət, qanunlara icranın məcburluğunun tərəfdarı görüntüsü yaratmağa çalışan deputatın söylədiklərinə, yumşaq desək, inanmaq çətindir.

Bu səbəbdən də suallar yaranır.

Görəsən, cənab Əhmədov məlum Quba hadisələrində xüsusi canfəşanlıq edən, "hakimiyyətin yanlış qərarları" ilə bağlı danışan deputatı tanımır?

Bəlkə o, sabiq müdafiə naziri Səfər Əbiyevin qohumu olan və ona mənsub şirkətlərin bu səbəbdən nazirliyin keçirdiyi tenderlərin əksəriyyətində "qalib" gəlməsi ilə milyonlar qazanmış deputatın ad soyadını bilər? Çünki həmin deputat indi də Səfər Əbiyevlə Çexiyada bir para biznes maraqlarına və fəaliyyətə malikdir.

Və ən nəhayət, bəlkə cənab Vahid Əhmədov sabiq milli təhlükəsizlik naziri Eldar Mahmudovla "çox məhrəm" münasibətlərə malik, Mahmudovun göstəriş və tapşırıqlarını yerinə yetirən, Mahmudovun hədəf kimi göstərdiyi, "Bu adama qarşı kampaniya başlanmalı, sıxışdırılmalıdır!" göstərişini verdiyi şəxsləri sərt tənqid etməyə başlayan, sonra da bəhs edilən kampaniyaya start verən deputatı tanıyar?

Çünki məhz həmin deputat atasının imkanlarından istifadə, daha doğrusu, sui-istifadə nəticəsində bir şəxs Bakının rayonlarından birində prokuror təyin edilmişdi.

Cənab Vahid Əhmədov, Milli Məclisin deputatı olan həmin şəxsi tanımırsınız?

Vallahi və billahi, o deputatda zərrə qədər cəsarət olsaydı, deputat mandatından könüllü imtina etməlidir.

Vahid Əhmədova gəldikdə isə...

Müstəqillikdən bu yana olan bütün hakimiyyətlərin dönəmlərində vitrində qalmağı bacarmaq manevrlik istedadından, elastik siyasətçi bacarığından xəbər verir. Vahid Əhmədov kimi adamın birdən-birə hakimiyyəti tənqid atəşinə tutması, "mənəm-mənəmlik" iddiası onun əslində atmalı olacağı ən sonuncu addımdır.

Bu isə heç, amma heç yaxşı iş deyil.

Mustafa Ömər Son.az