Son.az Lent.az-a istinadən onları sizin diqqətinizə çatdırır:

Uşaq ayaqqabısı seçərkən nələrə diqqət edilməlidir? Bugünkü mövzumuz bununla bağlıdır. Sizə doktor Mehmet Uçarın faydalı məsləhətlərini təqdim edirik:

Ayaqqabı körpənin ortopedik inkişafını dəstəkləyən geyim məhsuludur və düzgün seçilməlidir.

Bədəni sürətlə dəyişən və inkişaf edən körpənin yeriməyə başlayarkən addımlarının yerdə möhkəm durmasını təmin edəcək bir ayaqqabıya ehtiyacı var.

Ayaqqabı məsələsində tələsib-tələsməmək qərarı mövsüm və xarici amillərə görə dəyişir. Uşağın ilk addımları yay dövrünə təsadüf edərsə, bir müddət yalın ayaq və corabla gəzməsi sağlıqlıdır, qışda isə ayağı ilk olaraq soyuqdan, yağışdan qorumaq lazımdır.  

Uşaq ayaqqabıları necə olmalıdır?

Birincisi, düzgün ölçüdə olmalıdır. Doğru ölçünü seçə bilmək üçün ayaqqabıları böyüklərdə olduğu kimi, səhər deyil, günortadan sonra, ayaqların şişdiyi vaxt almaq lazımdır. Bunu da unutmayın ki, uşaqlarda ayaqlar hər il iki ölçüyə qədər böyüyür. Ona görə də 3 aydan bir uşağa aldığınız ayaqqabının kiçik olmadığını və ayağın inkişafı üçün kifayət qədər yer təmin etdiyini yoxlamaq çox vacibdir.

Uzunluq testi. Körpənin baş barmağı ilə ayaqqabının ucu arasındakı məsafəni yoxlamaq üçün ayaqqabının ön tərəfinə basın. Körpənin ayaq barmağı nə sıfırlanmalı, nə də ayaqqabının ucundan çox uzaqda olmalıdır. Yarım santimetrlik boşluq əladır. Uşağın ayağından ən azı yarım ölçü böyük olan ayaqqabı seçin ki, böyüyən ayağı yerləşdirməyə imkan olsun. Bu məsafə barmaqların inkişafı və hərəkəti üçün lazımdır.

Enlik testi. Əlinizlə ayaqqabıların yanlarına basaraq ayaq barmaqlarının vəziyyətini təyin edin. Uzunluq testində olduğu kimi, enindən də ayaqqabı ayağa yapışmamalıdır.

Daban testi. Uşağın topuğundan tutun və ayağını ayaqqabıda yuxarı-aşağı hərəkət etdirin. Onun ayağı bayıra çıxmadan ayaqqabı içində sərbəst hərəkət edirsə, ideal ölçüdə ayaqqabı seçmisiniz. Amma ayaq ayaqqabıda ümumiyyətlə, oynamırsa və ya oynayarkən ayaqqabıdan çıxırsa, bu ayaqqabının ölçüsü uşaq üçün düzgün seçim deyil.