Bunu Trend-ə açıqlamasında Milli Məclisin deputatı Sevil Mikayılova bildirib.

S. Mikayılova qeyd edib ki, İran Prezidenti Məsud Pezeşkianın Azərbaycana ilk rəsmi səfəri iki ölkə arasında əlaqələrin möhkəmləndirilməsi və regional əməkdaşlığın inkişafı baxımından çox mühüm əhəmiyyətə malikdir.

"Pezeşkianın bu səfəri Azərbaycan-İran arasında mövcud olan dostluq və əməkdaşlıq münasibətlərini daha da möhkəmləndirmək və yeni strateji hədəflərə yönəltmək məqsədi daşıyır. Səfər çərçivəsində aparılan danışıqlar iqtisadiyyat, enerji, nəqliyyat, mədəniyyət və təhlükəsizlik sahələrində əməkdaşlığın inkişaf etdirilməsi istiqamətində konkret addımların atılmasına stimul verir. Həmçinin, Prezident İlham Əliyev və İran Prezidenti Məsud Pezeşkian arasında imzalanan Birgə Bəyanat ölkələrimiz arasında əlaqələrin yeni mərhələyə qədəm qoyduğunu və regional əməkdaşlığın inkişafında mühüm addım olduğunu əyani şəkildə göstərir. Bu sənədlər, qarşılıqlı faydaya əsaslanan əməkdaşlığın hüquqi bazasını möhkəmləndirərək praktiki fəaliyyətin genişlənməsinə xidmət edəcək", - deyə deputat əlavə edib.

Sevil Mikayılova vurğulayıb ki, Prezident İlham Əliyev İran Prezidenti Məsud Pezeşkianla mətbuata birgə bəyanatı Azərbaycan və İranın beynəlxalq arenada bir-birini dəstəkləyərək regional səviyyədə daha güclü bir mövqe tutduqlarını göstərir.

"Prezident İlham Əliyevin qeyd etdiyi kimi, hər iki ölkə istər BMT olsun, istər İslam Əməkdaşlıq Təşkilatı, ECO, Qoşulmama Hərəkatı və digər təşkilatlar çərçivəsində daim bizim nümayəndələrimiz bir-birinin yanındadır. Bu ifadə, Azərbaycan və İran arasındakı güclü və uzunmüddətli əlaqələrin bir təzahürüdür. Eyni zamanda, iki ölkənin bir-birinə qarşılıqlı dəstəyini və əməkdaşlıq prinsiplərinə sadiqliyini bir daha təsdiqləyir. Çünki Azərbaycanın xarici siyasəti çoxşaxəlidir və beynəlxalq əməkdaşlıq formatı zəngindir. Həmçinin, İran Prezidenti Məsud Pezeşkianın Qarabağın Azərbaycanın ayrılmaz tərkib hissəsi olduğuna dair açıq dəstəyi yalnız Azərbaycanın suverenliyini və ərazi bütövlüyünü təsdiqləmək deyil, həm də beynəlxalq hüquq normalarına, ədalətə və regional əməkdaşlıq prinsiplərinə uyğun bir yanaşmadır. Bu dəstək, həm İranın, həm də beynəlxalq ictimaiyyətin ərazi münaqişələrinə yanaşmasında əsas götürülən hüquqi prinsiplərinə sadiqliyini nümayiş etdirir", - deyə o əlavə edib.

Deputat bildirib ki, Azərbaycan və İran arasındakı əlaqələr tarixi köklərə və müasir əməkdaşlığa bağlıdır. Bu münasibətlər 1991-ci ildə Azərbaycanın müstəqilliyini qazandığı gündən rəsmi şəkildə inkişaf etməyə başlayıb.

"Diplomatik əlaqələr 12 mart 1992-ci ildə qurulmuşdur və bu, iki ölkə arasında güclü əməkdaşlıq əlaqələrinin əsasını qoyub. İran, Azərbaycanın müstəqilliyini 25 dekabr 1991-ci ildə tanıyıb və bundan sonra iki ölkə arasında diplomatik münasibətlər qurulub. İranın Bakı şəhərində 1969-cu ildən fəaliyyət göstərən konsulluğu, 1992-ci ilin mart ayında Azərbaycan Respublikasının İran İslam Respublikasındakı səfirliyi kimi fəaliyyətini davam etdirir. 1992-ci ilin dekabr ayında isə Azərbaycan Respublikasının İran İslam Respublikasında səfirliyi fəaliyyətə başlayıb. İranın Naxçıvan şəhərində Baş Konsulluğu 1992-ci ilin mart ayından, Azərbaycanın Təbriz şəhərində isə Baş Konsulluğu 2004-cü ilin oktyabrından fəaliyyət göstərir", - deyə S. Mikayılova əlavə edib.

Deputatın sözlərinə görə, Azərbaycan və İran arasında son illərdə müxtəlif sahələri əhatə edən ümumilikdə 147 sənəd imzalanıb.

"Bu sənədlərin imzalanması, iki ölkə arasındakı əməkdaşlığın nə qədər geniş və dərin olduğunu göstərir. İqtisadi sahədə də əməkdaşlıq hər iki ölkənin maraqlarına xidmət edir. Ticarət, enerji, nəqliyyat, kənd təsərrüfatı və humanitar sahələrdə əməkdaşlıq daha da möhkəmlənir. Azərbaycan-İran əməkdaşlığı həmçinin, 3+3 regional məşvərət mexanizmi çərçivəsində də davam edir. Bu mexanizm, Azərbaycan-İran-Rusiya, Azərbaycan-İran-Türkiyə və Azərbaycan-İran-Gürcüstan-Türkiyə kimi regional əməkdaşlıq formatlarını əhatə edir. Bu cür əməkdaşlıq regionda iqtisadi inteqrasiyanı təşviq etməklə yanaşı, həm də sabitlik və təhlükəsizliyin təmin edilməsinə kömək edir. Ümumiyyətlə, Azərbaycan-İran əlaqələri strateji əhəmiyyət kəsb edir və regionda sabitliyin təmin edilməsində konstruktiv rol oynayır", - deyə S. Mikayılova fikrini tamamlayıb.