Son.az xarici mediaya istinadən xəbər verir ki, gənc aktrisanın ailəsi onun ölüm xəbərini 17 aprel tarixində yayımlanan onlayn nekroloqla açıqlayıb.

Ölüm səbəbi rəsmən açıqlanmasa da...

Rəsmi ölüm səbəbi açıqlanmasa da, ailə Sophienin uzun illərdir şəxsi mübarizələr apardığını bildirib.

Açıqlamada qeyd olunub:

"Sophie mehriban və etibarlı bir qız idi. Bu xüsusiyyəti bəzən onun istismar edilməsinə səbəb olurdu"

Ailəsi həmçinin onun yazı və rəsmlərə olan ehtirasının, həm daxili zənginliyini, həm də yaşadığı ağrını əks etdirdiyini vurğulayıb:

"O, dayanmadan yazır və çəkirdi. Bu sənətlər onun nə qədər dərin düşüncəli olduğunu göstərdiyi kimi, yaşadığı ağrını da əks etdirirdi. Yazdıqları və çəkdikləri, keçdiyi travmaların və çətinliklərin bir xəritəsi idi".

Ailə, Sophieyə göstərilən peşəkar və şəxsi dəstəyə baxmayaraq, onun taleyini dəyişməyin mümkün olmadığını acı şəkildə etiraf edib:

"Ən yaxınları, terapevtləri, hüquq-mühafizə orqanları və ona kömək etməyə çalışan digər insanlar çox kədərlidirlər. Bütün səylərə baxmayaraq, onu xilas edə bilmədilər".

Açıqlamada o da qeyd olunub ki, Sophie yaşadığı travmalar və utanc hissi ilə mübarizə aparmaq üçün özünü müalicə etməyə çalışırdı və bu, onun ölümünə səbəb olub.

İstedadlı ulduz itirildi

Sophie Nyweide yaradıcı, idmanla məşğul olan və yaşına görə olduqca müdrik bir gənc kimi xatırlanır. Hələ uşaqlıqdan aktrisa olmağı xəyal edirdi və bu sənətə heyrətamiz bir rahatlıqla qədəm qoymuşdu.

Nyu-Yorkda təhsil alan Sophie həm ingilis, həm də ispan dillərində sərbəst danışırdı. Bu isə ona beynəlxalq kino sahəsində tez uyğunlaşmaq və əməkdaşlıq qurmaq imkanı verirdi.

Sophienin son ekran çıxışı 2015-ci ildə ABC kanalının "What Would You Do?" adlı realiti proqramında olub.

Kameralardan uzaqda isə o, oxumağı, rəsmlə məşğul olmağı və idmanı çox sevirdi.

Ailəsi qeyd edib ki, Sophie çəkiliş meydanlarında özünü ən xoşbəxt hiss edirdi:

"O, bir başqasına çevrilə bildiyi film setlərində özünü təhlükəsiz hiss edirdi. Orada onun istedadını və rifahını dəstəkləyən insanlar vardı".

Xatirəsinə dəstək çağırışı

Sophie Nyweidenin ailəsi onun xatirəsinə ABŞ-da cinsi zorakılığa qarşı ən böyük təşkilat olan RAINN-ə ianə edilməsini xahiş edib.

Hollivudda ard-arda itkilər

Fevral ayında da Hollivud Michelle Trachtenbergin qəfil vəfatı ilə sarsılmışdı. "Buffy the Vampire Slayer" və "EuroTrip" filmləri ilə tanınan aktrisa 39 yaşında dünyasını dəyişmişdi. Yaxın günlərdə açıqlanan məlumatlara görə, onun ölüm səbəbi şəkərli diabetlə bağlı fəsadlar olub.

Kənan Son.az