Nişan məclisindən qızın hamilə qaldığı məlum olub və ailələr evdə yaxın qohumların iştirakı ilə toy məclisi də təşkil ediblər. Hamilə olan qız xəstəxanaya müayinəyə gedən zaman həkimlər bu barədə polisə məlumat veriblər. Buna qədər ailələr məsələni gizli saxlamağa çalışıblar.

Faktla bağlı cinayət işi açılıb. Məhkəmə istintaqı dövründə onların övladları dünyaya gəlib.

Zərərçəkmiş kimi tanınan 13 yaşlı qız və ailəsi şikayətçi olmayıblar. Onların övladlarının dünyaya gəlməsi də yüngülləşdirici hal kimi nəzərə alınıb.

Məhkəmənin hökmü ilə Şəhriyar (ad şərtidir) barəsində şərti cəza təyin edilib. Həbsdə olan Şəhriyar azadlığa buraxılıb və barəsində polis nəzarətinə verilmə qətimkan tədbiri seçilib.

Rəsmi açıqlamada bildirilib ki, Ağcabədi rayonunda 2010-cu il təvəllüdlü G.M.-in valideynləri polis şöbəsinə dəvət olunaraq, onlarla profilaktiki söhbət aparılıb. Qız öz valideynlərinin himayəsinə təhvil verilib.

Hadisə mətbuatda və sosial şəbəkələrdə ciddi müzakirələrə səbəb olub.

Modern.az hadisə ilə bağlı Ağcabədi rayonun deputatı, Milli Məclisin Aqrar siyasət komitəsinin sədri Tahir Rzayevin fikirlərini öyrənib. 

Millət vəkili qeyd edib ki, ona hadisə ilə bağlı birbaşa müraciət olunmayıb. Bu haqda müvafiq qurumlar aidiyyatı üzrə işlər görəcək. Hadisə araşdırılacaq və günahkarlar kimlərsə, sözsüz ki, cəzalandırılmalıdır. 

"Bu kimi hallar qətiyyən xoşagələn deyil və qanuna ziddir. 13 yaşlı birinin ailə həyatı qurması, ata və ananın səhlənkarlığı və dövlətə xəyanəti hesab edirəm. 13 yaşlı biri ailə sahibi ola bilməz, dünyaya gətirdiyi uşaq da normal olmaz. O qız təhsil almalı, oxumalı, dünya görüşü formalaşmalı idi. Digər tərəfdən həmin qızla evlənən adam da xəyanətkardır. Onun şəxsi məsuliyyəti yoxdur, mənim nəzərimdə həmin adam cinayətkardır. Hüququn ali olduğu, təbliğatların aparıldığı belə bir dövrdə bu cür işlər görən birini heç cür müdafiə etmək düzgün deyil. 13 yaşlı qızın özünə qayğı, diqqət lazımdır. O qızın özü elə uşaqdır. Bu cür qızla evlənmək vəhşilik, insanlığa sığmayan hadisədir" - deyə o bildirib. 

T. Rzayev vurğulayıb ki, bu cür hallar tək Ağcabədidə baş vermir, digər rayonlarda da oxşar hadisələrin şahidi ola bilərilk: "Bu hamımızın düşünməli olduğu problemdir. Biz bunlara göz yumaraq balalarımızı oda atmış olarıq. Onların həyatı, gələcəyi var. O cəmiyyət içində olmalı, ona fayda verməlidir. Yoxsa gözü açılan kimi qız uşağını ərə vermək onun sağlamlığına ziyandan tutmuş, uzun illər əziyyət çəkəcəyinin göstəricisidir. Çünki həmin qız ana, qadın olmağa, ailə idarə etməyə, uşaq tərbiyə etməyə hazır deyil. Ailənin uşaqdan imtinası, xəbərləri yoxmuş kimi davranmaq ana-atanın məsuliyyətdən qaçmaq üçün etdiyi hərəkətdir, amma onlar ağır məsuliyyətə cəlb olunmalı, həbs edilməlidir". 

Deputat Ağcabədidə əvvəllər 16-17 yaşlı qızlar ailə həyatı qurduğunu, lakin ilk dəfədir ki, 13 yaşlı qızın başına belə hadisə gəldiyini də bildirib.

"Cənub zonasında bu kimi hadisələrə daha çox rast gəlinir.13 - 14 yaşında uşaqların hələ şüuru formalaşmayıb. O yaşda qızlar özünü yeni-yeni tanıyır, amma onu qoruyan, yönləndirən ailəsi, ətrafı, məktəbidir. Ola bilər o uşaqdır, amma anası, məktəbi, qohumları uşaqla danışmalı, onu başa salmalıdır. Hər bir insanda bu hisslər oyana bilir. Amma bu regionun deyil bütün Azərbaycanı düşündürməli olduğu problemdir. Biz bir millət, xalqıq. Hər birimiz balalarımızın gələcəyini düşünməliyik"- sonda deputat qeyd edib.