ACBAR, 1988-ci ildən Pakistanın Pişəvar şəhərində, Pakistan-Əfqanıstan sərhədində əfqan qaçqınları ilə çalışan QHT-lərin təşəbbüsü ilə humanitar yardım və xidmətlərin koordinasiyasını təmin etmək məqsədilə yaradılıb və 203 beynəlxalq və yerli QHT-ni bir araya gətirən agentlikdir. Özünün 35 illik təcrübəsinə əsaslanaraq əfqan xalqının rifahı və inkişafı naminə müxtəlif beynəlxalq və yerli QHT-lər, eləcə də dövlət orqanları arasında əməkdaşlığı effektiv şəkildə koordinasiya edir. 2002-ci ildən ACBAR-ın baş bürosu Əfqanıstanın paytaxtı Kabildədir və hazırda təşkilat ölkənin yeddi vilayətində fəaliyyət göstərir, yaxın gələcəkdə isə daha da genişlənməyi planlaşdırır.

ACBAR-ın ali orqanı Ümumi Assambleyadır ki, bu da bütün üzvlərin iştirakını təmin edir, təşkilatın inklüzivlik və əməkdaşlıq prinsiplərinə sadiq olduğunu nümayiş etdirir, demokratik idarəetmə strukturunda fəaliyyət göstərir.

Bir qədər də Agentliyin yeni təyin edilmiş rəhbəri, həmvətənlimiz Namiq Heydərov haqda.

Namiq Heydərov beynəlxalq inkişaf, humanitar yardım, diplomatiya və terrorizmə qarşı mübarizə sahəsində yüksək ixtisaslı mütəxəssisdir. O, Rusiya Xarici İşlər Nazirliyinin Diplomatik Akademiyasında beynəlxalq münasibətlər üzrə PhD dərəcəsi alıb və Harvard Universitetində əlavə akademik hazırlıq keçib. Karyerası ərzində BMT və aparıcı beynəlxalq qeyri-hökumət təşkilatlarında rəhbər vəzifələrdə çalışıb, İranda, Əfqanıstanda, Pakistanda, Mərkəzi Asiya və Yaxın Şərqdə əsas humanitar və inkişaf proqramlarını idarə edib. O, bölgədə yüksək səviyyəli siyasi danışıqlarda fəal iştirak edib, strateji təşəbbüslər və diplomatik proseslərə töhfələr verib. Terrorizmə qarşı mübarizə üzrə mütəxəssis olan N.Heydərov BMT-nin "Əl-Qaida" və İŞİD fəaliyyəti üzrə ən məlumatlı mütəxəssislərindən biri hesab olunur.

O, terrorizmə qarşı mübarizə, radikalizmin qarşısının alınması və təhlükəsizlik strategiyalarının hazırlanması sahəsində dövlət orqanları, beynəlxalq təşkilatlar və təhlükəsizlik strukturları ilə sıx əməkdaşlıq edib. Böhran idarəetməsi, diplomatik danışıqlar və tərəfdaşlıq əlaqələrinin yaradılması sahəsində əhəmiyyətli təcrübəyə malik olan Namiq Heydərov, mürəkkəb beynəlxalq şəraitdə effektiv fəaliyyət göstərir. Azərbaycan, rus, ingilis, fars və türk dillərini bilməsi, ona müxtəlif geosiyasi kontekstlərdə uğurla çalışmaq imkanı yaradır. / Globalinfo.az