Trend xəbər verir ki, bu barədə məlumat Milli Məclisin bu gün keçirilən plenar iclasında müzakirə edilən Nazirlər Kabinetinin 2024-cü ildə fəaliyyəti haqqında hesabatda öz əksini tapıb.

Hesabatda bildirilib ki, sosial obyektlərdən 132 şagird-yerlik məktəb və 50 yerlik uşaq bağçasının layihələndirilməsi və tikintisi, eləcə də Baş Planda gəlir gətirən obyektlər (investorlar tərəfindən inşa olunması gözlənilən ticarət, iaşə, xidmət və digər obyektlər) üçün ərazilər nəzərdə tutulub. Sus kəndində fərdi yaşayış evlərinin və sosial obyektlərin işçi layihələri tam hazırlanıb, ərazidə söküntü-təmizləmə işləri başa çatdırılıb, evlərin tikintisi və şaquli planlaşdırma işləri tam həcmdə görülüb. Qəsəbədaxili su ötürücü kanalların və dağ yamacları boyunca kanalların tikintisi, təsərrüfat yollarında 600 mm-lik politelen boru ilə kanalların qurulması, su-kanalizasiya sistemi işləri, məktəb və bağçanın tikintisi başa çatdırılıb, Həkəri çayı boyunca istinad (beton) divarları çəkilib, yağış sularından mühafizə üçün istinad divarlarının tikintisi işləri 80 % icra olunub.

Bəylik kəndinin (Sus kəndi ilə birlikdə) Baş Planının Şəhərsalma əsaslandırması hazırlanıb, Dövlət Şəhərsalma və Arxitektura Komitəsinə təqdim edilib və müsbət rəy alınaraq təsdiq edilib. Kənd üzrə evlərin (91 ev) tikintisi 93 %, klub-icma mərkəzinin tikintisi 72 %, yol yatağının tikintisi 82 %, istinad divarlarının tikintisi 67 %, ərazinin şaquli planlaşdırması 75 % icra edilib.

Cəbrayıl rayonunun Şükürbəyli kəndi üzrə (Dəjəl, Şıxalıağalı kəndləri və Mahmudlu qəsəbəsi ilə birlikdə) birinci mərhələdə 635 ailə üzrə fərdi yaşayış evlərinin, 1 ədəd 360 şagird-yerlik məktəbin, 2 ədəd 80 yerlik uşaq bağçasının, həkim məntəqəsi, inzibati binanın, klub-icma mərkəzinin, musiqi məktəbinin və yanğınsöndürmə deposunun tikintisi nəzərdə tutulub. Əlavə olaraq ticarət binası, məişət evi, motel, idman-sağlamlıq mərkəzi, aptek, çörək sexi, ərzaq marketinin layihələndirilməsi və tikintisi planlaşdırılıb. Ərazidə söküntü-təmizləmə işləri, evlərin və sosial obyektlərin təməlinin qoyulması, inzibati binanın tikintisi tam başa çatdırılıb. Bundan əlavə, 526 evin və suvarma xəttinin çəkilişi 50 %, bağça və həkim məntəqəsinin tikintisi 90 %, su-kanalizasiya xətlərinin çəkilməsi 30 %, elektrik və rabitə xətlərinin çəkilməsi 35 %, məktəbin tikintisi 25 %, aptekin tikintisi 10 %, yol tikintisi 7 %, qaz və su xətlərinin çəkilməsi 20 %, kabel xətlərinin çəkilişi işləri 25 % icra olunub. Klub-icma mərkəzinin və musiqi məktəbinin tikintisinə başlanılmış və hazırda işlər davam etdirilir.

Laçın rayonunun Güləbird kəndində 581 ailəlik yeni yaşayış məntəqəsinin salınması məqsədilə birinci mərhələdə 150 fərdi evin, 432 şagird-yerlik məktəbin, 80 yerlik uşaq bağçasının, klub-icma mərkəzinin, inzibati binanın, ailə sağlamlıq mərkəzinin, idman klubu, məişət evi, mərasim zalı, ərzaq marketi və ticarət binasının layihələndirilməsi və tikintisi nəzərdə tutulub. Yaşayış məntəqəsinin tikintisinə 2024-cü ilin aprel ayında başlanılıb, ərazidə söküntü-təmizləmə işləri tam başa çatdırılıb, bütün evlərin bünövrəsi qazılaraq 58 evin tikintisinə başlanılıb. Ərazidə yol yatağının açılması işləri 70 %, yolların çəkilişi və su-kanalizasiya sisteminin qurulması 40 %, evlərin, məktəb, bağça, inzibati binanın, klub-icma mərkəzinin tikintisi işləri 10 % yerinə yetirilib. Hazırda işlər davam etdirilir.