Mövzu ilə bağlı Trend-ə açıqlama verən iqtisadçı Eyyub Kərimli bildirib ki, bu gün lombard xidmətindən istifadə edən əhalinin imkanlarına baxsaq, yalnız bankdan kredit götürə bilməyən təbəqənin müraciət etdiyini görərik.

Onun sözlərinə görə, müraciət edənlər əsasən rəsmi iş yeri olmayan, kredit tarixçəsi məhdudiyyətli olan insanlardır:

"Ya da gəlirlərini bəyan edə bilməyən insanlara bu yol daha çox asan olur. Çünki girov əsasında müəyyən vəsait əldə edilir. Sənədləşmə asandır, qısa müddət ərzində proses həll olunur".

İqtisadşı qeyd edib ki, lakin lombardlar bəzən insanları məyus edir, bəziləri öz öhdəliklərini yerinə yetirmir:

"Bəzi hallarda lombardların iflasa uğraması və yoxa çıxması müşahidə olunur. Digər tərəfdən lombardlar riskli kredit ayıran təşkilat olduqlarından banklara nisbətən böyük faizlər təqdim edirlər. Bu da sözsüz ki, bəzi hallarda insanları çətin vəziyyətə salır. Yaxud şərtlər bankların şərtlərindən çox mürəkkəb və ağır olur. Müəyyən vəziyyətdə insanlar əlavə öhdəliklərə və cərimələrə məruz qalırlar. Bəzən girovların götürülməsində gecikmələr baş verir, hətta girovların itirilməsi və mənimsənilməsi halları da müşahidə olunur. Onun üçün də hesab edirəm ki, lombardla hər hansı münasibətlər qurulanda mütləq müqavilə şərtlərini dəqiq oxumaq lazımdır. Həmçinin lombardın fəaliyyətini də yoxlamaq lazımdır, bundan sonra lombard xidmətindən istifadə etmək daha məqsədəuyğun olar".