Son.az xəbər verir ki, havanın isti keçdiyi günlərdə çoxları sərinlənmək üçün buz kimi su ilə duş qəbul edir, lakin mütəxəssislər bu üsulun düşündüyümüz qədər təhlükəsiz olmadığını bildirirlər.

Lancaster Universitetindən professor Adam Taylor deyib ki, yay istisində bədəni soyutmaq məqsədilə soyuq duş almaq, əksinə, istiliyi bədənin daxilində saxlayaraq orqanizmi aldadır. Bu da xüsusilə yüksək təzyiq və ürək xəstəlikləri olan insanlar üçün ciddi təhlükə yaradır.

İnsan bədəni öz təbii istiliyini - təxminən 37°C-ni qorumaq üçün tərləmə və istilik yayımı ilə çalışır. Bu proses zamanı dərialtı damarlar genişlənir, qan səthə yönəlir və istilik xaricə ötürülür. Lakin ətraf mühit bədən istiliyindən daha isti olduqda, bu mexanizmlər zəifləyir və yanlış sərinlənmə üsulları daha da zərərli ola bilər.

Taylor bildirib ki, isti mühitdən çıxıb qəfildən soyuq suyun altına girmək orqanizmdə "şok effekti" yaradır. Soyuq su dərialtı damarları daraldır, qan axınını azaldır və bədən daxilində istiliyi "kilidləyir". Bu isə orqanizmin sərinləməsinə əngəl törədir.

15°C ətrafında olan su isə "soyuq şok reaksiyası"na səbəb ola bilər. Bu vəziyyətdə damarlar qəfildən daralır, qan təzyiqi yüksəlir və ürəyə yük düşür. Ürək xəstələri üçün bu vəziyyət ölümcül nəticə doğura bilər.

Bu tip reaksiyalar nadir hallarda baş versə də, mütəxəssislər yay aylarında çox soyuq su ilə duş almaqdan çəkinməyi tövsiyə edirlər. Taylor bildirir ki, ən təhlükəsiz və effektiv üsul - 26-27°C-lik ilıq su ilə duş almaqdır. Bu həm qan axınını artırır, həm də bədəni təhlükəsiz şəkildə soyudur.

Soyuq duşun başqa bir mənfi tərəfi isə gigiyenadır. Belə su bədəndəki yağ, tər və çirk qatlarını kifayət qədər təmizləyə bilmir, bu da pis qoxu, sızanaq və dəri problemlərinə yol açır.

Əgər hər halda soyuq su ilə duş almaq istəyirsinizsə, mütəxəssislər əvvəlcə əllər və ayaqlardan başlayaraq bədəni tədricən öyrəşdirməyi məsləhət görürlər. Bu üsul vücudu şoka salmadan sərinlənməyə imkan verir.

İsmayıl Son.az