Son.az xəbər verir ki, bunu moderator.az-a açıqlamasında xalq artisti, sevimli sənətkar Şahnaz Haşımova deyib. O uşaqlıq illərini xatırlayıb.

"Uşaq olanda atam həmişə başımın üstündə saz çalıb, oxuyub. Şeirlərini söyləyib. O lay-lay ilə, şeirlərlə böyümüşəm. Anamın da gözəl səsi olub. Ev işləri görəndə həmişə oxuyurdu. Aybəniz xanımla mənim səsim valideynlərimizdən bəhrələnib. 6 yaşım var idi, Zeynəb xanımı və digər sənətkarları televizorda görəndə, uzun saçlarım var idi, saçımı hörə-hörə oxuyurdum. İlk dəfə "Ceyran" mahnısını oxumuşam. Bütün yaradıcı ömrümü Gəncənin mədəni mühitində keçirmişəm. Bu gün də Gəncədə yaşayıb, yaradıram. Gəncədən heç vaxt ayrılıb, Bakıya gedə bilmədim. Gəncə Musiqi kollekcində dərs deyirəm, tələbələr yetişdirirəm. Bakıya gəlməyimlə bağlı çox dəvətlər gəlib, amma getməmişəm. Hətta o illərdə Opera və Balet teatrına da dəvət almışdım, amma getmədim. "Leyli və Məcnun" əsərini 1980-ci illərdə hazırlayıb, Leyli obrazında səhnəyə çıxdım" deyə sənətkar bildirib.

Sənətkar ailə həyatından da danışıb.

"Gənc qız olanda düşünürdüm ki, mütləq musiqiçi ilə ailə həyatı quracam ki, mənim ifaçılığıma mane olmasın. Bilirsiniz ki, həyat yoldaşım, əməkdar artist Eldar Abdullayev mahir kamança ifaçısıdır. Oğlum Tural 6 aylıq olanda Eldar müəllimin ürəyində problem yarandı, ağır əməliyyat keçirdi. O vaxtdan qorxdum ki, onu itirə bilərik. Ona heç bir problemi bildirmədim, ağrını-acını özüm çəkdim. Ailənin bütün rəhbərliyi, idarəçiliyi onun üzərinə düşüb. Bir yerə mən gedəndə, bir yerə də o gedib. O məndən əvvəl "Göy-göl" ansamblında çalışıb. Bu ansamblın ilk yaradıcı kollektivinin üzvü olub. Eldar müəllim təkcə kamançasını çalıb, mən təkcə oxuyub getməmişik. Bu kollektivə ailə kimi baxmışıq. O mənim tək ömür-gün yoldaşım deyil, həm həmkarımdır, həm də dostumdur. Sevgisini, qayğısını sözündə yox, əməlində göstərib" deyə sənətkar bildirib.

Xalq artisti gənclərə tövsiyyələrini də verib.

"Bu gün musiqimizə, muğam sənətinə dövlətimiz tərəfindən böyük diqqət və qayğı var. Yetişən gənc nəsil də istedadlıdır. Amma bəzən gənclər də asan yolla gündəmə gəlmək istəyirlər. Bu hər gəncə aid deyil.  Toya gedib pul qazanmaq yaxşıdır, amma toyun da öz repertuarı olmalıdır. Bizim insanlarımız, xalqımız musiqini dərindən duyandırlar. Toyda da sən ağzına gələni oxuya bilməzsən" deyə xanəndə bildirib.

Son.az