Son.az xəbər verir ki, bunu moderator.az-a açıqlamasında xalq artisti, "Şöhrət", "Şərəf" ordenli rəqqasə Roza Cəlilova deyib.

"Sənətdə yaxşı rəqabət şərtdir. Təsəvvür edin ki, ilk qastrollardan sonra artıq şəxsən mənim üçün rəqs qurulması tələbini irəli sürdüm. Daha Əminə Dilbazi üçün qurulan rəqsləri oynamayacağımı dedim. Bunun nəyi pis idi və ya niyə pis anlaşılmalı idi? Bax ondan sonra mənim üçün rəqslər quruldu. Bilirsiniz niyə? Çünki o artıq öz imzasını qoymuşdu. Nə o mənim, nə də mən onun yerini tuta bilməzdik. Mənim üçün qurulan rəqsləri də məndən başqa heç kim oynaya bilmədi. Çünki öz sirlərim var idi. Mən baletdən xalq rəqsinə sevərək keçid etmişəm. İstəyirəm ki, indi xalq rəqsinə gələnlər mənim kimi sevib gəlsinlər", - deyə sənətkar bildirib.

Xalq artisti bildirib ki, hər zaman özünə və sənətinə hörmət edib.

"Əminə Dilbazi deyirdi ki, Rozanın bir xasiyyəti xoşuma gəlmir ki, səhnədə baş əyməyi sevmir. O mənim xasiyyətimi çox yaxşı bilirdi. Deyirdi ki, camaat necə əl çalsın ki, sən səhnəyə çıxasan? Deyirdim ki, Əminə, elə bilirəm ki, az əl çalırlar. Özümə, sənətimə qarşı çox hörmətli və tələbkar idim. Konsertdən sonra həmişə həyat yoldaşım mənə deyirdi ki, Roza, hamı getdi, sən hələ çıxmırsan?! Ona deyirdim ki, istəyirəm tamaşaçı elə bilsin ki, mən həyatda yox, səhnədəyəm. 1 adam da çöldə olanda mən konsertdən sonra çıxıb evə getmirdim. Bu günkü zamanla o illəri müqayisə edirəm. Rəqqasə bu toydan çıxıb, o biri məclisə gedir. Rəqs səhnə üçün yaranıb. Səhnə sənətkar üçün pilləkəndir. Tamaşaçının zövqünü oxşayıb, onların rəğbətini qazanmaq böyük və çətin işdir. Hamı buna nail ola bilmir", - deyə sənətkar bildirib.