Son.az AZƏRTAC-a istinadən bildirir ki, müsabiqənin təşkilatçısı qismində 2002-ci ildən bəstəkarın adını daşıyan uşaq musiqi məktəbi çıxış edib. Rusiya paytaxtındakı M.İ.Rudomino adına Xarici Ədəbiyyat Kitabxanasında mükafatlandırma mərasimi və laureatların konserti keçirilib.

Müsabiqə 2018-ci ildən təşkil olunur və 2021-ci ildən bəri beynəlxalq statusa malikdir. 2024-cü ildə məxsusi olaraq pianoçular və fortepiano duetləri üçün əlavə müsabiqə təsis edilib. Həmin vaxtdan hər iki formatı illər üzrə təsnif etmək qərara alınıb; cüt illərdə fortepiano, tək illərdə isə bu il olduğu kimi, çoxjanrlı müsabiqələr təşkil edilir.

Müsabiqənin münsiflər heyətinə Azərbaycanın Xal artisti, P.İ.Çaykovski adına Moskva Dövlət Konservatoriyasının professoru Fərəc Qarayev rəhbərlik edib. Onunla birlikdə bu heyətə aparıcı pedaqoq və musiqiçilər - professor Mixail Dubov, dosentlər Marina Katarjnova və Dmitri Murin, Rusiyanın Əməkdar artisti Oleq Tantsov və digər tanınmış incəsənət ustaları daxil edilib.

Mərasimi giriş sözü ilə açan Heydər Əliyev Fondunun Rusiya Federasiyasındakı nümayəndəliyinin Humanitar proqramlar şöbəsinin müdiri Tamilla Əhmədova Qara Qarayevin adının təkcə Azərbaycanda deyil, bütün musiqi aləmində ehtiramla anıldığını və sevildiyini qeyd edib: "Qarayev XX əsrin milli və nadir yaradıcı nəslinin ən böyük bəstəkarlarından biridir. O, muğamı, milli ritmləri və harmoniyanı klassik formalarda təqdim edib. Bəstəkar özünü dünyanın iki qütbünün - Qərbin və Şərqin musiqiçisi kimi hiss edirdi. Onun müəllimi və böyük dostu Dmitri Şostakoviç deyirdi ki, Qarayevin musiqisi təksə səslərin harmoniyası deyil, həm də insan taleyi, tarix, zaman və epoxa haqqında düşüncələrdir.

T.Əhmədova əlavə edib ki, bəstəkar bizlərə dünyanı xüsusi səslərlə eşitmək qabiliyyətini aşılayıb. O, Arif Məlikov, Vasif Adıgözəlov, Xəyyam Mirzəzadə və başqaları kimi parlaq orijinal musiqiçilərdən ibarət gözəl nəsil yetişdirib.

T.Əhmədova müsabiqənin təşkilatçılarını və iştirakçılarını təbrik edib, onlara uğurlar və yaradıcılıq qələbələri arzulayıb və Heydər Əliyev Fondunun vitse-prezidenti Leyla Əliyeva başda olmaqla Fondun nümayəndəliyinin bu müsabiqəni dəstəklədiyini, qalibləri bəstəkarın vətəninə dəvət etdiyini xüsusilə vurğulayıb.

Azərbaycanın Rusiyadakı səfiri Rəhman Mustafayevin müsabiqə iştirakçılarına təbrikinin mətnini səfirliyin humanitar məsələlər üzrə müşaviri Yusif Vəzirov oxuyub.

Sonra müsabiqənin laureatlarının adları açıqlanıb. Diplomların və xatirə hədiyyələrinin təqdimatından sonra laureatların konserti olub.