Oksford Universitetində aparılan araşdırmada tələbələrin beyninə çox zəif elektrik cərəyanı verildikdə riyaziyyat bacarıqlarının artdığı müşahidə edilib. Xüsusilə beynin müəyyən bölgələri arasında əlaqəsi zəif olan şəxslərdə bu metod daha güclü təsir göstərib.

Son.az xəbər verir ki, 72 universitet tələbəsinin qatıldığı araşdırmada iştirakçıların başına elektrodlar yerləşdirilib və onların beyninə hiss olunmayacaq qədər zəif elektrik siqnalları göndərilib. Bu siqnallar beynin riyaziyyatla bağlı iki bölgəsinə - ön alın payı (dlPFC) və arxa parietal korteksə (PPC) yönləndirilib. Nəzarət qrupuna isə gerçək olmayan, yəni təsirsiz siqnallar tətbiq olunub.

Beş gün ərzində ümumilikdə 150 dəqiqə davam edən bu stimullaşdırma müddətində tələbələr müxtəlif riyaziyyat testlərindən keçib. Testlər həm hesablama bacarığını, həm də əzbərləmə qabiliyyətini ölçüb. Nəticələrə görə, dlPFC bölgəsinə edilən stimullaşdırma yeni hesablama bacarıqlarının inkişafında effektiv olub. Lakin PPC bölgəsinə verilən siqnallar əzbərləmə yönümlü öyrənmədə nəzərəçarpacaq fayda verməyib.

Tədqiqatçılar həmçinin iştirakçıların beyinlərindəki ön və üst paylar arasında əlaqənin gücünü də qiymətləndiriblər. Bu iki bölgənin birlikdə işləməsi riyaziyyat öyrənməsində əsas rol oynayır. Əvvəlcədən bu bağlantısı zəif olan tələbələrin testlərdə daha çox çətinlik çəkdiyi, lakin onlara tətbiq olunan dlPFC stimullaşdırmasının ən böyük irəliləyişə səbəb olduğu ortaya çıxıb.

Araşdırma həmçinin göstərib ki, bu cür stimullaşdırma artıq yüksək riyaziyyat səviyyəsində olan şəxslərə mənfi təsir edə bilər. Alimlər izah edir ki, beynin artıq effektiv işləyən sisteminə xaricdən siqnal göndərmək performansı azalda bilər.

Tədqiqatı aparan nevroloq Roi Cohen Kadosh bu texnologiyanın ev şəraitində istifadəyə yaxın olduğunu və öyrənmə çətinliyi və diqqət pozğunluğu kimi problemləri olan insanlar üçün ümidverici nəticələr verdiyini deyib. Lakin müstəqil mütəxəssislər bu texnologiyanın geniş istifadəyə verilməzdən əvvəl daha çox sınaqdan keçirilməsinin vacib olduğunu bildirib.

Binghamton Universitetindən psixoloq Sung Joo Kim isə qeyd edib ki, belə cihazların hər insanın beyin quruluşuna uyğun tənzimlənməsi vacibdir. Onun sözlərinə görə, "əgər beynin müəyyən bölgələrinə siqnal göndərmək istəyirsinizsə, fərdi beyin anatomiyasını nəzərə almalısınız."

İsmayıl Son.az