Rusiya Federasiyası Prezidentinin köməkçisi Vladimir Medinskinin 9 iyun tarixində "Russia Today" kanalına verdiyi müsahibədə Qarabağı "mübahisəli ərazi" adlandırması regiondakı sabitliyi yenidən kövrək hala gətirən siyasi təxribatlardan biridir. Medinski hər nə qədər tarixçi olduğunu iddia etsə də, onun bəyanatlarında tarixi biliklərinin kasad olması aşkar görünür.

Qarabağ Azərbaycan ərazisidir və bu, təkcə regional yox, həm də qlobal hüquq sistemində qəbul edilmiş bir faktdır. BMT Təhlükəsizlik Şurasının qətnamələri, Avropa İttifaqının və İslam Əməkdaşlıq Təşkilatının qərarları, nəhayət, Rusiyanın özü də daxil olmaqla dünyanın bütün ölkələrinin Azərbaycanın ərazi bütövlüyünü tanıması bu gerçəyin möhürüdür. Medinskinin bu faktdan xəbərsiz olması ya informasiya blokadasının nəticəsidir, ya da bilərəkdən aparılan dezinformasiyanın bir hissəsidir.

Azərbaycan Xarici İşlər Nazirliyinin rəsmi açıqlamasında da bildirildiyi kimi, Qarabağ heç zaman mübahisəli ərazi olmayıb və bu bölgədə baş verənlər Azərbaycanın suveren ərazilərində həyata keçirilmiş antiterror tədbirləridir. Medinskinin fikirləri nə tarixi bilik, nə də diplomatik məsuliyyət daşıyır - bu sadəcə revanşist ritorikadır.

Lavrov və onun kimi peşəkar diplomatlar illərlə çalışıb Rusiya Federasiyasının Cənubi Qafqaz siyasətində neytrallıq görüntüsünü saxlayıblar. Amma Medinski kimilər, görünür, bu səliqəli maskaları cırmaqlamaqla məşğuldur. Onun sözləri həm Ermənistanı ümidləndirir, həm də sülh prosesinə qarşı açıq zərbədir.

Siyasi şərhçilərin də vurğuladığı kimi, Medinski neytral tarixçi deyil - o, təbliğatçı kimidir. Qarabağın "mübahisəli" adlandırılması Ermənistanın revanşist çevrələrinə mesajdır: "Biz hələ də burdayıq." Bu cür bəyanatlar həm regionun sabitliyini pozur, həm də Rusiya-Azərbaycan münasibətlərini zədələyə bilər.

Cənubi Qafqazda mövcud olmuş vəziyyət, əslində, Rusiyanın yüzillərlə həyata keçirdiyi "parçala və hökm sür" siyasətinin nəticəsidir. Bu siyasətə görə, bölgədə süni gərginlik yaradılır, tərəflər bir-birinə düşmən edilir və nəticədə qazanan tərəf Rusiya olur. Bu strategiya Ermənistanın işğalçılığını dəstəkləyən, onu silahlandıran və Azərbaycan torpaqlarının 30 il işğal altında qalmasına şərait yaradan yanaşmanın nəticəsidir.

Medinski tarixin bu çirkin üzünü ört-basdır etməyə çalışır. O, 2020-ci ildə baş vermiş Vətən müharibəsini Rusiya-Ukrayna münaqişəsi ilə müqayisə edərək həm Azərbaycan xalqının haqq savaşını gözdən salır, həm də faşizmə qarşı mübarizə tarixini siyasi populizmə qurban verir. Halbuki Azərbaycan heç bir ölkənin ərazisinə girməyib, əksinə, beynəlxalq hüquqla tanınan torpaqlarını işğaldan azad edib. Bu müharibənin yalnız bir analoqu varsa, o da məhz SSRİ-nin faşizmə qarşı apardığı müharibə ola bilər.

Qarabağ məsələsi artıq beynəlxalq münaqişə yox, Azərbaycanın daxili məsələsidir. Dövlət öz sərhədləri daxilində suveren hüquqlarını təmin edib və separatçılığa son qoyub. Medinskinin bu fonda "mübahisə" axtarması yersizdir. Əgər bu, Ermənistanda siyasi dəyişikliyə zəmin yaratmaq üçün atılan addımdırsa, bu, həm də Rusiyanın bölgədə yeni imperial oyunlara başlamaq niyyətindən xəbər verir.

Medinskinin "tarix dərsi" tarixə və regiona qarşı hörmətsizlikdir. Tarixi saxtalaşdırmaqla imperiya ruhunu diriltmək istəyənlər bilməlidir ki, artıq XXI əsrdir və xalqlar bu cür müstəmləkəçi ritorikalara qarşı yetərincə təcrübə qazanıblar.

Vladimir Medinskinin açıqlamaları təkcə tarixi saxtalaşdırma deyil, həm də Rusiya diplomatiyasının içindəki şovinist qövsün nümayişidir. Onun iddiaları, revanşizmə xidmət edən ritorikası və Cənubi Qafqazda sabitliyə zərbə vuran ritorikası təkcə qəbuledilməz deyil - həm də təhlükəlidir. Rusiya bu cür ritorikalardan imtina etməsə, nə öz nüfuzunu, nə də Cənubi Qafqazda balanslı mövqeyini qoruyub saxlaya biləcək. Medinskilər isə tarixə yox, arxivə aid adamlardır.

İslam Son.az