Kamran İmanov beynəlxalq assambleyaya sədr seçilib


Digərləri 05 Okt 2021 13:03:00 207 0

Kamran İmanov beynəlxalq assambleyaya sədr seçilib

Azərbaycan Respublikasının Əqli Mülkiyyət Agentliyinin İdarə Heyətinin sədri Kamran İmanov Ümumdünya Əqli Mülkiyyət Təşkilatının (ÜƏMT) Müəlliflik hüququna dair Müqaviləsi Assambleyasının sədri seçilib.

Son.az Trend-ə istinadən bildirir ki, məlumata görə, K.İmanovun bu vəzifəyə seçilməsi oktyabrın 4-də ÜƏMT üzv dövlətlərinin Assambleyalarının İsveçrənin Cenevrə şəhərində işinə başlamış 62-ci sessiyasında adıçəkilən təşkilatın assambleyalarının və komitələrinin vəzifəli şəxslərinin seçkiləri zamanı baş tutub.

Assambleyanın sədr müavini vəzifəsinə isə Amerika Birləşmiş Ştatlarının nümayəndəsi Jasmin Fulena seçilib.

Qeyd edək ki, İdarəçiliyi ÜƏMT tərəfindən həyata keçirilən Müəlliflik hüququna dair Müqavilə 20 dekabr 1996-cı ildə qəbul edilib. Müəlliflik hüququ sahəsində qocaman beynəlxalq sənəd olan Ədəbi və bədii əsərlərin qorunması haqqında Bern konvensiyasını dəstəkləyən bu müqavilə yeni rəqəmsal mühitdə ən mühüm beynəlxalq sazişdir. Müqavilə ədəbi və bədii əsərlərin beynəlxalq müstəvidə effektiv və vahid qaydalara uyğun qorunmasını, müəlliflərin hüquqları və geniş ictimaiyyətin maraqları arasında balansın saxlanılmasını müəyyən edir. Hazırda bu Müqaviləyə 110 ölkə qoşulmuşdur. Azərbaycan Respublikası 2006-cı ildən Müqavilənin üzvüdür. K.İmanov 2019-2021-ci illərdə isə Ədəbi və bədii əsərlərin qorunması haqqında Bern konvensiyası Assambleyasının sədri olub.