Bəs, Beynəlxalq Avtovağzalın yaxınlığından Abbas Mirzə Şərifzadə küçəsinə çəkilməsi nəzərdə tutulan bu yol nə qədər effektivdir?

Son.az bildirir ki, nəqliyyat məsələləri üzrə ekspert Elməddin Muradlı məsələni Trend-ə şərh edib. Bildirib ki, bu istiqamətdə tıxacların aradan qaldırılması üçün daha əvvəl körpünün şaxələndirilməsi barədə də təkliflər verilib, amma mövcud şəraitdə alternativ yolun çəkilməsi daha məqsədəuyğundur: "Keçmiş Nəqliyyat Nazirliyinin çəkdiyi körpü bir az geniş tikilsəydi və 20 Yanvar dairəsi üzərindən həm sağa, həm də sola qanadlar atılsaydı, bu gün o körpü daha faydalı olardı. Amma sovet dövründən qalma şablon bir layihə kimi işlənildiyi üçün effektiv nəticəsi də olmadı. Dünyanın qabaqcıl ölkələrində indi belə standart körpülər tikilmir. Körpülər tikiləndə şaxələndirilir. Hesab edirəm ki, AAYDA-nın təklif etdiyi alternativ yol 20 Yanvar dairəsində xaotik vəziyyəti qismən aradan qaldıracaq. Bu hissə Azərbaycan paytaxtının şimal qapısıdır. Bu qapı nə qədər rahat və təhlükəsiz şəkildə qurulsa, nəticədə bir o qədərə yaxşı olacaq".

Ekspert bildirib ki, hazırda, eyni vəziyyət Xırdalan dairəsində də yaşanır və gələcəkdə orada yenə genişləndirmə işləri aparılsa, yol kənarında inşa edilmiş bütün evlər sökülməli olacaq: "O evlərin tikintisinə hansı şəraitdə icazə verildiyi də araşdırılmalıdır. Ümumiyyətlə, bu tip iri yol layihələri köklü şəkildə, dərindən təhlil edilməli, 50-100 il üçün hesablanmalıdır. Təəssüf ki, bu gün Azərbaycandakı yolların bir çoxu 3-5 il üçün nəzərdə tutulub. Və ya mövcud şəraitə uyğun olaraq çıxış yolu kimi qəbul edilib. Bu layihələr işlənərkən uzunmüddətli perspektiv nəzərə alınmalıdır".