Hər kəs vətəni sevməsə, insan deyil əsla...


Siyasət 27 Sen 2021 09:16:00 98 0

Hər kəs vətəni sevməsə, insan deyil əsla...

Hər millətin, etnosun, cəmiyyətin, xalqın, dövlətin, ölkənin öz elitası var.

Onların hər biri "elita" dedikdə fərqli insanları nəzərdə tuturlar.

ABŞ vətəndaşları üçün elita maliyyəçilər, İT mütəxəssisləri, texnogenika insanlarıdır.

Yaponlar üçün elita mühəndislər və alimlərdir.

Ruslar üçün elita ziyalılar, alimlərdir.

Norveçlər üçün elita sadə fermerlərdir.

Haitililər üçün elita tez və yaxşı pul qazanıb "həyat sahibləri" olanlardır.

Əfqanlar üçün elita din xadimləridir.

Bizim üçünsə...

... Ötən il, bu gün, sentyabrın 20-də, elə indiki vaxtda, axşam saatlarında Savaşın başlayacağını bilirdim. Dəqiq bilirdim.

Sentyabrın 27-də Savaş başlandı.

Müharibə yox, hərbi əməliyyatlar yox, məhz Savaş.

Çünki bıçaq sümüyə dirənmişdi.

Çünki Ermənistan bu dəfə nəyin bahasına olursa-olsun, Tərtər və Goranboy rayonlarını işğal edərək Gəncəyə çıxmaq istəyirdi.

Çünki Ermənistan kollektiv Qərbin, Şərqin, Cənubun və Şimalın tam 28 il ərzində Azərbaycan ərazilərinin işğladan təmizlənməsi, işğala son qoyulması üçün ona faktiki olaraq heç nə etməməsindən ifrat dərəcədə, ağlasığmaz dərəcədə qudurmuşdu.

Azğınlaşmışdı Ermənistan.

Savaş başlandı.

Sentyabrın 27-dən başlayaraq noyabrın 9-dək insanlarımız qayğılı idi.

Gözlər xəbərlərdə, telekanallarda - hamı cəbhədən xəbər gözləyirdi.

Sinirlər gərilmişdi, nəbz uzaqlarda, səngərlərdə vururdu - vücud ən müxtəlif məkanlarda, şəhərlərdə, ölkələrdə olsa da.

Bir sual milləti düşündürürdü: ermənilərin müdafiəsini yara biləcəyikmi, yarsaq, bu, nəyin bahasına başa gələcək, döyüşlər necə gedəcək.

Sosial şəbəkələrdə Vətən mövzusu hər şeydən və hər kəsdən üstün oldu.

Qayğılı, fikirli kişilər və gözlərindəki yaş bir mikroməqama bənd olmuş xanımlar.

Anlayırdılar ki, millətin və dövlətin gələcəyi, hər birimizin gələcəyi orada, Savaşda həll olunur.

Bir nəfərin ölümü faciədir. Min nəfərin ölümü statistika.

Savaşda minlərlə gəncimizi şəhid verdik, amma bu ölümlər statistika yox, ulusun oyanışı, dirçəlişi, qüruru oldu.

İndi, o günlərdən bir il sonra düşünək: kimdir bizim milli elita?

Təbii, alimlər, həkimlər, mütəxəssislər, pedaqoqlar intellektual elitardır.

Amma elitanın fərqli növləri var ki, onların hamısının məcmusu və müntəxabatı ŞƏHİDLƏR oldular.

Bəli, məhz onlar, yaxşıların yaxşıları.

Nişanlı olacağı günü səbirsizliklə gözləyən və arzulayan 18 yaşlı gənc səngərdən çıxıb düşmən üzərinə atılırsa, həyatını alimlərin, müəllimlərin, mütəxəssislərin, həkimlərin yaşaması üçün Vətənə qurban etdi.

Kiçik qızının fotosuna smartfonunda baxıb sonra o balaca, gözəllər gözəli yavrunun yaşaması və böyüməsi üçün qızını bir daha görmək imkanını orada on metr irəliləmək imkanına qurban verən zabitdir elita.

Axşam anasına "Narahat olma, hər şey yaxşıdır, tezliklə qayıdacağam" yazıb səhər saatlarında minalanmış sahəyə atılan, oradakı yaralı komandirini çıxarmaq üçün canını fəda edən gəncdir elita.

"Vətən yaxşıdır!" deyib gülümsəyən və ölümə gülümsəyərək gedən əsgərlərdir elita.

Onların hər biri elita olduqları üçün məcmu elita - Azərbaycan Ordusu idilər.

O ordu ki, baba təki bizə qüruru, nənə təki var olduğunun qədrini bilməyi, ana kimi toxtaqlığı, ata kimi namusla qeyrəti, Vətən kimi sadiqliyi dedi hər gün.

Hər gün millət olaraq Ordumuzun qürur, məntiq, ümid və inam dərsini aldıq.

44 gün ağrılı, acılı, amma unudulmaz oldu.

Bayraq üçün güllələrə tuş etdiyin, bayrağa dönən alnından öpürəm, şəhidim.

Təşəkkür edirəm sənə, Azərbaycan əsgəri...

Elçin Alıoğlu Son.az