Qızılcadan qorunmağın ən yaxşı yolu profilaktik peyvəndlərinin vaxtında edilməsidir


Digərləri 20 Noy 2020 23:50:00 146 0

Qızılcadan qorunmağın ən yaxşı yolu profilaktik peyvəndlərinin vaxtında edilməsidir

Ümumdünya Səhiyyə Təşkilatının məlumatına görə, hər yüz qızılca xəstəsindən ən azı birində ölüm və ya ağırlaşma halı qeydə alınır. Eyni zamanda, qızılcanın COVID-19, Ebola virusu və qripdən daha yoluxucu olduğu bildirilir.

Koronavirusun simptomlarına bənzəyən yüksək hərarət, boğaz ağrısı və titrəmə qızılcanın əsas əlamətləridir və əsasən bədəndə yaranan qızartılarla fərqlənir. Ancaq bu səpgilər dörd-beş gündən sonra üzə çıxır. Hazırda daha çox COVID-19 infeksiyasına baş qarışsa da, qızılca payız-qış aylarında daha çox aktivləşir.

Son.az bildirir ki, həkim-pediatr Hafizə Məmmədova AZƏRTAC-a deyib: "Çoxları qızılcanı zərərsiz uşaq xəstəliyi hesab etsə də, əslində bir çox ağırlaşmalara səbəb ola bilər. Qızılcadan qorunmağın ən yaxşı yolu uşaqların profilaktik peyvəndlərinin vaxtında edilməsidir. Əks təqdirdə onun yoluxması, ağırlaşmaları və COVID-19-un tüğyan etdiyi indiki vaxtda onunla eyni vaxta düşərək ağır nəticələr verə bilər".

Həkim-pediatrın dediyinə görə, ən pisi isə qızılcanın yoluxucu olmasıdır. Xəstənin yaxınlığında olanların ona yoluxma ehtimalı çox yüksəkdir, hətta peyvənd olunan böyüklər də qızılca virusuna yoluxa bilərlər. Sadəcə peyvənd edilənlər bu xəstəliyi başqalarına nisbətən yüngül keçirirlər.