Son.az qafqazinfo-ya istinadən xəbər verir ki, separatçı rejimin "başçı"sı bu barədə öz Feysbuk hesabında açıqlama verib.

"Döyüşlərə son qoymaq məqsədilə özüm də Ermənistanın Baş nazirinə müraciət etdiyimi bir daha təsdiqləyirəm. Bu qərar silahlı qüvvələrin komandanlığının belə bir ehtiyac üzərində israr etməsi və hərbi vəziyyətin nəzərə alınması yönündə qəbul edilib", - Arutyunyan qeyd edib.

Onun sözlərinə görə, erməni tərəfinin müəyyən ciddi problemləri var idi, bu şəraitdə müharibənin davam etməsi daha böyük insanın və hər şeyin itirilməsinə səbəb olacaqdı.

Xatırladaq ki, iki gün öncə Ermənistan Silahlı Qüvvələrin Baş Qərargahının rəisi Onik Qasparyan açıqlama verərək bildirmişdi ki, hərbi əməliyyatların dayandırılması ilə bağlı qərar onun təklifi ilə verilib.

O, Baş nazir Nikol Paşinyanın vəziyyətin çoxşaxəli və çoxtərəfli qiymətləndirilməsindən sonra sənədi imzalamağa qərar verdiyini qeyd etmişdi.