Son.az bildirir ki, bunu SİA-ya millət vəkili Sevil Mikayılova deyib.

Deputatın sözlərinə görə, bu gün Azərbaycanda təhsilin əlçatanlığı tam təmin edilib və BMT qiymətləndirməsinə əsasən, ölkəmiz savadlılıq səviyyəsinə görə ən yüksək pillədə dayanır: "Təhsil sisteminin müasir standartlara uyğunlaşdırılması və təhsildə mövcud yeniliklərin tətbiqi gənclərin hərtərəfli bilik və bacarıqların qazanmasını təmin edir. Təhsil müəssisələrinin fəaliyyətini qabaqcıl standartlar əsasında qurması xüsusi önəm daşıyır. Bu mənada son illər ərzində ölkə ərazisində yeni məktəbəqədər təhsil müəssisələrinin, baxçaların və uşaq evlərinin bərpası və inşasını qeyd etmək lazımdır.

Xüsusilə qeyd edilməlidir ki, Azərbaycan dövlət büdcəsində təhsilə ayrılan vəsait ümumi büdcə xərcləri arasında ikinci yerdədir. Azərbaycan təhsilində ən uğurlu nəticələrdən biri də məktəb tikintisinin geniş vüsət almasıdır. Son 17 ildə ölkədə 3700-ə qədər məktəb tikilib və əsaslı təmir olunub. Bundan əlavə, universitet binalarının yenilənməsi, təmiri və bərpası da böyük sürətlə və geniş miqyasda həyata keçirilib. Bu il ölkə üzrə 147 məktəbin tikintisi nəzərdə tutulur. Onların böyük hissəsi Bilik Gününə hazır vəziyyətə gətirilib.

Heydər Əliyev Fondu bütün ölkədə böyük rəğbətlə qarşılanan "Yeniləşən Azərbaycana yeni məktəb" proqramı, "İnternat məktəblərinin inkişaf proqramı", "Təhsilə dəstək", ümumiyyətlə dövlət maraqları baxımından müstəsna əhəmiyyətə malik bir sıra layihələri uğurla gerçəkləşdirib. "Yeniləşən Azərbaycana yeni məktəb" layihəsi həyata keçiriləndən sonra hətta respublikamızın ən ucqar regionlarında da hər cür ləvazimatla təchiz olunmuş, müasir tələblərə cavab verən məktəblər tikilib istifadəyə verilib. Təkcə bu tədris ilində Heydər Əliyev Fondunun təşəbbüsü və dəstəyi ilə ölkəmizdə, o cümlədən Bakı, Gəncə və Mingəçevir şəhərlərində, eləcə də müxtəlif rayonlarda 62 təhsil müəssisəsi inşa və əsaslı təmir olunaraq müəllim və şagirdlərin ixtiyarına verilib. Azərbaycan cəmiyyətində təlim-tərbiyə və təhsil məsələsinə hər zaman xüsusi həssaslıq göstərilir.

Sosial həyatımızın və gələcəyimizin mühüm komponenti olan təhsil sisteminin yeniliklərə hər zaman açıq olması dövlət prioritetlərindən biridir və Prezident İlham Əliyevin təşəbbüsü ilə reallaşdırılacaq "Ağıllı məktəb" layihəsi və təhsil proqramları bu mənada növbəti möhtəşəm addım olacaq. Yeni ağıllı texnologiyaların tətbiq olunması heç şübhəsiz təhsil sisteminin müasirləşdirilməsi və keyfiyyətcə yeni beynəlxalq səviyyəyə qaldırılmasını təmin edəcək".