Son.az Trend-ə istinadən bildirir ki, Gəncə şəhər Nizami Rayon İcra Hakimiyyətinin başçısı Nizami Hacıyev, Milli Məclisin deputatı Naqif Həmzəyev və hüquq - mühafizə orqanlarının əməkdaşları xüsusi karantin rejiminin tədbiqi ilə əlaqədar olaraq Gəncənin Mahrasa bağı yaşayış massivində, M.C.Paşayev və Təbriz küçələrində olublar. Onlar bu ərazilərdə fəaliyyət göstərən ərzaq mağazalarındakı vəziyyətlə tanış olub, sahibkarlarla görüşüblər.

Maarifləndirmə xarakteri daşıyan görüşlər zamanı sahibkarlara Nazirlər Kabineti yanında Operativ Qərargahın tapşırıq və tövsiyələrinə əməl olunmasının vacibliyi vurğulanıb, qablaşdırılmayan məhsullarla bağlı sahibkarlara bir sıra tövsiyələr verilib.

Ərazidə fəaliyyət göstərən əczaxanalara baş çəkən rəsmilər tibbi maska, əlcək və spirtin olub-olmaması ilə maraqlanıblar. Onlara tibbi spirt və əlcəklərin daim satışda olduğu, lakin tibbi maskalara tələbatın yüksək olması səbəbindən tez bir zamanda alındığı bildirilib.

Naqif Həmzəyev və Nizami Hacıyev xüsusi karantin rejimi qaydalarına əməl etməyərək küçəyə çıxan sakinlərlə də maarifləndirici söhbətlər aparıblar. Onlara özlərinin və ətrafdakıların sağlamlıqları üçün zəruri, yaxud təxirəsalınmaz hal olmadıqca çölə çıxmamaları tövsiyə olunub.