Ukrayna Nazirlər Kabineti martın 12-dən aprelin 3-dək ölkə ərazisində təhsil müəssisələrinin bağlanmasını, kütləvi tədbirlərin qadağan edilməsini və bir sıra ölkələrlə hava əlaqəsinin dayandırılmasını özündə ehtiva edən karantin rejimi tətbiq edəcək.

“Report” TASS-a istinadən xəbər verir ki, bu barədə Ali Radanın Avropa Həmrəyliyi Partiyasından olan deputatı Viktoriya Syumar məlumat verib.

Onun sözlərinə görə, sabahdan Ukraynada idman və mədəniyyət tədbirləri ilə əlaqədar 200-dən çox insanın kütləvi toplaşması qadağan ediləcək.

“Kütləvi toplaşmalara qoyulan qadağa dövlət əhəmiyyətli tədbirlərə aid olmayacaq”, - deputat bildirib.

Nazirlər Kabinetinin qərarı sərhəddəki əksər nəzarət-keçid məntəqələrinin bağlanmasını da nəzərdə tutur.

“219-dan 49-u qalacaq”, - deputat qeyd edib. Beləliklə, hökumətin qərarı dövlət sərhədinin tam bağlanmasını nəzərdə tutmur.