Bakı. Samir Əli - Ötən il Azərbaycanda aparılan əsaslı islahatlar 2020-ci ildə ölkənin özəl sektorunda əməkhaqqının artmasına səbəb ola bilər. Bunu Trend-ə açıqlamasında iqtisadçı Elşad Məmmədov deyib. Ekspert bildirib ki, ötən il aparılan islahatlar nəticəsində dövlət sektorunda çalışanların əməkhaqqısı əhəmiyyətli dərəcədə artıb: "Bu proses cari ildə özəl sektora da təsir etməlidir. Dünya təcrübəsi də, iqtisadiyyat elmi də onu deməyə əsas verir ki, ölkədə əməkhaqqının artım lokomotivi, təkanverici qüvvəsi dövlət sektorudur. Dövlət sektorunda əməkhaqqının artırılması sözsüz ki, özəl sektordakı artımlara da zəmin yaradır. Ona görə də düşünürəm ki, biz bu istiqamətdə müəyyən proseslərin şahidi olacağıq. Eyni zamanda, əməkhaqqı artımı prosesi ardıcıl şəkildə davam etdirilməlidir".