Müdd adlı çəki vahidinə adətən, fitrə zəkatı ilə bağlı fətvalarda rast gəlirik. Müdd ərəblərdə orta çəki vahidi sayılır, qoşa ovuc dolusu yemək bir müdd hesab edilir. 4 müdd bir "sa"nı təşkil edir. Müddün müasir hesabatla neçə qram olması barədə alimlər arasında fikir ayrılıqları vardır. Müxtəlif dövrlərdə, müxtəlif məzhəblərdə, müxtəlif alimlər tərəfindən müdd fərqli ölçülərdə hesablanıb: 510, 530, 544, 650, 694, 750, 765, 833 qram. Bu ölçüdən daha yüksək hədd təyin edilmiş zamanlar da olmuşdur. Geniş yayılmış rəyə əsasən, bir müdd təqribən 750 qrama bərabərdir və fitrə zəkatı adambaşı dörd müdd, yəni 3 kq-dır. Müasir müctəhidlərin əksəriyyəti by fikri müdafiə edirlər. Ayətullahül-üzma Seyyid Həkim isə bir müddün təqribən 870 qram olduğuna və fitrə zəkatının ümumilikdə 3.480 qram yemək kimi hesablanmasına fətva vermişdir.