"Azərbaycan Hava Yolları" iPhone və Android smartfonları üçün mobil əlavəni təqdim edib


Digərləri 11 Okt 2019 13:08:00 226 0

"Azərbaycan Hava Yolları" iPhone və Android smartfonları üçün mobil əlavəni təqdim edib

Azərbaycanın milli aviadaşıyıcısı - AZAL aviaşirkəti iOS (9.0 və daha yüksək versiyalar) və Android (5.0 və daha yüksək versiyalar) əməliyyat sistemi bazasında çalışan smartfonlar üçün öz mobil əlavəsini təqdim edib.

"Azərbaycan Hava Yolları" QSC-nin Mətbuat xidmətindən Son.az-a verilən məlumata görə, istifadəçilər üçün rahat interfeysə malik mobil əlavə smartfon sahiblərinə kod-şerinq sazişi əsasında digər aviaşirkətlərlə birlikdə yerinə yetirilən uçuşlar da daxil olmaqla bütün istiqamətlər üzrə aviabiletləri əldə etməyə imkan verəcək.

Artıq aviabilet almış sərnişinlər bronu idarə edə, əlavə baqaj ala bilər, təyyarədə yemək və oturacaq seçə, həmçinin uçuşdan 24 saat əvvəl açılan onlayn qeydiyyatdan keçə bilərlər. iPhone istifadəçiləri minik talonunu "Apple Wallet" elektron cüzdanına əlavə edə biləcəklər.

Mobil əlavə üç dildə - azərbaycan, rus və ingilis dillərində təqdim edilir və həmçinin aviaşirkətin dəstək xidmətinə onlayn müraciət etməyə imkan verir. Məlumat bölməsində aviaşirkətin baqajın daşınması, tariflər və "AZAL Miles" proqramının əsas qaydaları təqdim olunub.

Qeyd edək ki, hazırda "AZAL Miles" bonus proqramının üzvləri üçün mobil əlavə də mövcuddur. İstifadəçilərin rahatlığı üçün gələcəkdə hər iki əlavənin funksionallığının birləşdirilməsi planlaşdırılır.

(adsgarden = window.adsgarden || []).push({});