Bakı. Sentyabrın 27-də Hyatt Regency İclas və Konfrans zalında Sənayenin və İnfrastrukturun Modernləşdirilməsi üzrə Alman-Azərbaycan Biznes Forumu keçirilib. Trend-in məlumatına görə, forum Alman-Azərbaycan Xarici Ticarət Palatası (AHK Azərbaycan) tərəfindən Almaniyanın Şərq Komitəsi və Şərqi Avropa İqtisadi Birliyi ilə əməkdaşlıq çərçivəsində təşkil olunub. Bu il forumun əsas mövzuları maliyyə və biznes mühiti, nəqliyyat və infrastruktur, kənd təsərrüfatı və qida sənayesi olub. Tədbirin əsas məqsədi alman və Azərbaycan şirkətlərini biznes platforması ilə təmin etmək, onların yeni işgüzar əməkdaşlıq üçün mövcud imkanları müzakirə etməsi, öz layihə və təkliflərini təqdim etməsinə şərait yaratmaqdır. Forumu salamlama nitqi ilə açan AHK Azərbaycanın İcraçı Direktoru Tobias Baumann tədbirin proqramını qısa şəkildə iştirakçılara təqdim edib. Forumun rəsmi açılış mərasimində Azərbaycan Respublikasının İqtisadiyyat nazirinin müavini Niyazi Səfərov, Almaniyanın Azərbaycandaki səfiri Volfqanq Maniq və Alman-Azərbaycan Xarici Ticarət Palatasının vitse-prezidenti Fərid İsayev salamlama nitqi ilə çıxış ediblər. İqtisadiyyat nazirinin müavini Niyazi Səfərov iştirakçılara sənayenin modernləşdirilməsi, qeyri-neft sektorunun şaxələndirilməsi, Azərbaycanda biznes və investisiya mühitinin inkişaf etdirilməsi məqsədi ilə həyata keçirilən sistematik tədbirlər barədə məlumat verib. N.Səfərov davamlı iqtisadi inkişafı, rəqabətqabiliyyətli iqtisadiyyatın və məşğulluğun təmin olunması, ixrac potensialının gücləndirilməsi, sahibkarlığın inkişafının dövlət siyasətinin əsas hədəflərindən biri olduğunu bildirib. Almaniya və Azərbaycan arasında ikitərəfli siyasi və iqtisadi münasibətlərin inkişafı haqqında danişan N.Səfərov, ticarət əlaqələrinin iqtisadi əməkdaşlığın əsas istiqamətlərindən biri olduğunu və 2019-cu ilin ilk 7 ayı ərzində iki ölkə arasında ticarət dövriyyəsinin 1 mlrd. ABŞ dollarından çox təşkil etdiyini vurğulayıb. Almaniyanın Azərbaycanda həyata keçirilən tvining layihələrinə böyük maraq göstərdiyini qeyd edən nazir müavini dövlət orqanları tərəfindən həyata keçirilən və əsasən energetika, kənd təsərüfatı, statistika, standartlaşma, insan hüquqları kimi sahələri əhatə edən tvining tenderlərinin əksəriyyətində alman nümayəndələrinin iştirak etdiyini bildirib. AHK Azərbaycanın Almaniyanın xarici iqtisadi siyasətində çox vacib bir platform olduğunu vurğulayan Volfqanq Maniq, yüksək səviyyəli tərəfdaşların bir araya gətirilməsində və alman şirkətlərinin Azərbaycan bazarı haqqında məlumatlılığının artırılması və yeni əməkdaşlıqların yaradılması üçün nümayəndə heyətlərinin səfərlərinin təşkilində Palatanın mühüm rolunu qeyd edib. Bundan əlavə, səfir bildirib ki, Azərbaycanın hüquqi əsaslarla beynəlxalq iqtisadi sistemə söykənən müasir və qloballaşan iqtisadiyyata doğru addımlamasında Almaniya hər zaman öz dəstəyəni göstərməyə hazırdır. Bundan sonra, Fərid İsayev AHK Azərbaycan tərəfindən təşkil olunan tədbirlərin və forumların Almaniya və Azərbaycan arasında ikitərəfli münasibətlərə və iqtisadi əməkdaşlığa verdiyi töhfədən bəhs edərək, Palatanın dövlət-özəl sektorları arasında əlaqələrin gücləndirilməsindəki mühüm rolunu vurğulayıb.