Bakı. Özbəkistanın qədim Xivə şəhərində “Rəqsin sehri” Beynəlxalq Festival keçirilib. Mədəniyyət Nazirliyindən Trend-ə verilən məlumata görə, festivala dünyanın 20 ölkəsindən və Özbəkistanın regionlarından gələn rəqs ansamblları qatılıblar. Ölkəmizi bu festivalda Əməkdar mədəniyyət işçisi Elçin Abbasovun rəhbərliyi ilə Fikrət Əmirov adına Azərbaycan Dövlət Mahnı və Rəqs Ansamblı təmsil edib. Festivalın təntənəli açılış mərasimi qədim “İçan Kala” Qoruq-Muzeyinin “Ata darvaza” giriş qapısının qarşısındakı meydanda olub. İştirakçıları Özbəkistan Mədəniyyət nazirinin müavini Azadbek Nazarbekov və Xarəzm vilayətinin hakimi Farxod Ermanov salamlayıb, onlara bu nüfuzlu festivalda uğurlar arzulayıb. Ölkəmizin Daşkənddəki səfirliyinin nəzdindəki Heydər Əliyev adına Azərbaycan Mədəniyyət Mərkəzi direktorunun müavini Polad Zeynalov ölkəmizdə mədəniyyət və incəsənətə dövlət qayığsından danışıb, bu sahədə Heydər Əliyev Fondunun fəaliyyətini xüsusi qeyd edib.