Energetika naziri və müavinləri şimal-qərb bölgəsində vətəndaşları qəbul edib (FOTO)


Digərləri 26 İyl 2019 17:36:00 192 0

Energetika naziri və müavinləri şimal-qərb bölgəsində vətəndaşları qəbul edib (FOTO)

Energetika naziri Pərviz Şahbazov Şəki şəhərində Enerji Məsələlərini Tənzimləmə Agentliyinin Şəki filialının inzibati binasında vətəndaşları qəbul edib.

Bakı. Energetika naziri Pərviz Şahbazov Şəki şəhərində Enerji Məsələlərini Tənzimləmə Agentliyinin Şəki filialının inzibati binasında vətəndaşları qəbul edib. Qəbulda Şəki və Qax rayonlarının sakinləri iştirak edib. Energetika Nazirliyindən Trend-ə verilən məlumata görə, həmin gün Energetika nazirinin müavini Samir Vəliyev Qəbələ şəhərində Qəbələ və Oğuz, nazir müavini Elnur Soltanov isə Zaqatalada Zaqatala və Balakən rayonlarının sakinlərini qəbul ediblər. Vətəndaşların müraciətləri elektrik enerjisi təchizatı, fərdi yaşayış evlərinin qazlaşdırılması, elektrik enerjisinin keyfiyyəti, elektrik xətlərinin köhnəlməsi, elektrik sayğacının quraşdırılması, sənədləşdirilməsi, elektrik enerjisinə görə borc və cərimələr, işlə təminat və digər məsələlərlə bağlı olub. Energetika Nazirliyinin aidiyyəti struktur bölmələrinin nümayəndələrinin iştirakı ilə keçirilmiş qəbullarda hər bir vətəndaşın müraciəti diqqətlə dinlənilib, qaldırılan məsələlərin bir qismi yerindəcə həllini tapıb, digər müraciətlərin isə araşdırılması və qanunvericiliyin tələblərinə uyğun həll edilməsi üçün müvafiq tapşırıqlar verilib. Nazirliyin fəaliyyət dairəsinə aid olmayan müraciətlər müvafiq qurumlara çatdırılmaq üçün qeydiyyata alınıb. Ümumilikdə qəbullarda 30-dan çox vətəndaşın müraciətinə baxılıb.