Portuqaliyada ilk superkompüter işə salınıb
Digərləri 20 İyl 2019 08:15:00 247 0
Portuqaliyada "BoB" adlı ilk superkompüter rəsmən istifadəyə verilib. O, Mino Universiteti nəzdində Qabaqcıl Hesablamalar Mərkəzində (Minho Advanced Computer Center, MACC) yerləşir. Superkompüter "MACC" Mərkəzi kimi əsasən günəş, külək və su elektrik stansiyalarından alınan "yaşıl" enerji ilə işləyəcək.
Son.az ICTnews-a istinadən bildirir ki, "BoB" Portuqaliya və Ostin Texas Universiteti arasında əməkdaşlıq çərçivəsində Portuqaliya Elm və Texnika Fonduna (FCT) verilən Texas Qabaqcıl Hesablamalar Mərkəzinin keçmiş "Stampede" superkompüterinin 20 dirəyindən ibarətdir. Səksən hesablama qovşağına malik superkompüterin yaddaş tutumu 2,6 terabayta, quraşdırılmış tutumu isə 1 petabayta bərabərdir. Superkompüterin ən yüksək məhsuldarlığı 1 petaflops olmaqla "Intel Xeon Phi KNL" prosessorları ilə təmin edilir.
2016-cı ilin iyununda "Stampede" 6400 qovşaqdan ibarət olub və TOP500 reytinqində 117-ci yeri tutub. Superkompüter "Stampede2" adlı yeni qurğunun inşası ilə əlaqədar 2017-ci ildə fəaliyyətini dayandırıb.
Qeyd edək ki, "MACC" Mərkəzi bu yaxınlarda təsis edilib. Onun yaradılması ilə bağlı qərar Portuqaliya və Ostin Texas Universiteti arasında əməkdaşlığın genişləndirilməsi ilə bağlı razılıq əldə olunduqdan sonra qəbul edilib.
Mərkəz 2020-ci ilin sonuna "Deucalion" adlı daha bir superkompüteri işə salmaq niyyətindədir. Onun hesablama məhsuldarlığının 9,4 petaflopsa çatacağı gözlənilir.