“Bərk sürən” oğlanlar, qan gölünə çevrilən yollar, ardıarası kəsilməyən faciələr... Avtovağzalın həndəvərində cəmləşənlər kimlərdir? REPORTAJ FOTO


Digərləri 19 İyl 2019 20:10:00 238 0

“Bərk sürən” oğlanlar, qan gölünə çevrilən yollar, ardıarası kəsilməyən faciələr...  Avtovağzalın həndəvərində cəmləşənlər kimlərdir?  REPORTAJ  FOTO

Masallıda "Mersedes Vito" və yük maşınının toqquşması nəticəsində 3 ailədən 8 nəfərin ölümü və 2 nəfərin ağır yaralanması hadisəsindən 10 gün ötdü. Artıq dəhşətli qəzanın necə baş verdiyinə dair video görüntülər yayılıb, "Mersedes Vito"nun sürücüsü Nizami Mustafayev həbs olunub.

Və o da  məlum olub ki, bu adi qəza, yaxud qəzavü-qədər deyil. Qeyri-qanuni sərnişindaşıma fəaliyyəti ilə məşğul olan, yüksək sürətlə qəzalar törədib onlarla insanın ölümünə səbəb olan sürücülərin rayonlararası yollarda növbəti terrorudur. Hansı ki, qəzadan bir neçə gün əvvəl N.Mustafayev sosial şəbəkədə də "bərk sürən" olduğunu yazıb. Etiraf edib ki, hədəfi sürəti saatda 240 km-a çatdırmaqdır. Həmin gün isə o, içərisi sərnişinlə dolu maşını ən azı 170-180 kilometr sürətlə sürürmüş... 

Son.az bildirir ki, virtualaz.org son qanlı qəzadan sonra Bakı Beynəlxalq Avtovağzalının həndəvərində cəmləşən, qeyri-leqal sərnişindaşıma ilə məşğul olan "Mercedes Vito" və "Viano" sürücüləri ilə bağlı araşdırma aparıb. Məlum olub ki, orada hələ də vəziyyət dəyişməyib, "xalturşiklər" əvvəlki qaydada - lisenziyasız-sənədsiz fəaliyyət göstəririlər. 

Hadisədir də, olub...

Dəhşətli qəzadan sonra mikroavtobus sürücülərinə ərazidən uzaqlaşmağı tapşırıblar. Amma onlar çox da uzağa getməyiblər-küçənin o biri tərəfinə keçiblər. "Vito" sürücülərindən biri yüksək səslə sərnişin çağırandan sonra sualımıza belə cavab verir. Deyir ki, onlar da bu küçədən digərinə keçiblər,  2-3 gün xəlvət fəaliyyət göstəriblər. 

"Bakı-Gəncə" marşrutu üzrə işləyən sürücülərdən bizi cəmi 3 saat yarıma Gəncədə çatdıracağımızı vəd edir. Amma jurnalist olduğumuzu bilən kimi sualımızı cavablandırmaq əvəzinə səssizcə ərazidən uzaqlaşmağımızı məsləhət görür: "Qəzadır, heç kim sığortalanmayıb. Kiminsə çörəyinə bais olmayın". 

Sərnişinlərdən biri, cavan qadın söhbətə müdaxilə edir, deyir ki, tez çatmaq üçün onlarla gedir, yoxsa elə avtobusa minərdi. Onsuz da yazmaqla nəyi isə dəyişməyə gücümüz çatmayacaq, "dəyirman yenə də öz bildiyin edəcək".  

Bakı-Qazax marşrutu ilə sərnişin daşıyan digər sürücü isə sualımıza sualla cavab verir: "Polissiz, ya müstəntiq? Lisenziya alıb-almadığımızın hesabatını onlara veririk". Və şəkil çəkməməyimiz üçün bizi düz avtovağzalın həyətinə kimi izləyir. 

"Vito"lardan şikayət... 

Taksi sürücüləri də "Vito"lardan şikayətçidirlər. Amil adlı sürücü deyir ki,  "Mersedes Vito"lar  onların bazarını "öldürüb", həm də maşını sürətlə sürməyə təhrik edirlər. "Əslində  yüksək sürətlə sürəndə diqqətin yolda olur. Amma yuxusuzsansa xeyri yoxdur, lap 200-lə sür, yenə də ani yuxu tutur",-Amil əlavə edir.